В неділю одкрыють літню школу русиньского языка

В неділю 7-го юна 2015 р. ся святочно одкрыє вже 6-тый річний Studium Carpato-Ruthenorum. Міджінародна літня школа русиньского языка і културы Studium Carpato-Ruthenorum 2015 зачне о семій годині вечур в пряшівскім пензіоні Atrium святочнов рецепційов і културным проґрамом, котры будуть одкрыты про верейность.

На 6-тім річнику літньой школы, котра закінчіть ся в суботу 27-го юна, будуть того року передавати лекції лекторы в складі: ПгДр. Кветослава Копорова, ПгД. із Інштітуту русиньского языка і културы Пряшівской універзіты в Пряшові, Мґр. Марек Ґай – екстерный співпрацовник спомянутого інштітуту, проф. Др. Павел Роберт Маґочій із Торонтьской універзіты, Мґр. Валерій Падяк, к. н. із Досліднього центру карпатістікы в Ужгороді, Асоц. проф. Др. Патріція Крафчік із Евырґріньской штатной універзіты і проф. ПгДр. Микола Мушинка, др. н, котрый є екстерным співпрацовником Інштітуту русиньского языка і културы. Лекції будуть по русиньскы і по анґліцькы.

Вже традічно почас літньой школы передавать ся і премія Александра Духновіча за Русиньску літературу. Того року ся так стане в рамках традічного літературного вечора в четверь 26-го юна. Подія зачне о 19.00 год. в просторах Театру Александра Духновіча в Пряшові. Тота подія так само одкрыта про верейность.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА