В наступний вікенд в ЗША «вернут» до Пряшова, повідят о ґенеалоґіі і будут варити…

Як сме заявляли на нашым портали, 5. листопада/новембра т.р., в Пілнічній Каролині в ЗША обдыла ся стріча присвячена місті Пряшові та Пряшівскій Руси, про котру оповідала єдна з участничок тогорічной 7. Медженародной Літньой Школы Русиньского Языка і Культуры Studium Carpato-Ruthenorum – Боні Кобек Бурк (Bonnie Kobec Burke). Тепер Карпаторусиньскє Общество просит на подібну подію, котра по части однесе ся до той самой обшыри.

В суботу, 12 листопада/новембра т.р. одділ орґанізациі в Джорджіі просит на дальше «одвиджаня» Пряшова і околиц в рамках споминів зо Studium Carpato-Ruthenorum. Тота сама прелеґентка запрезентує в рамках віртуальной прогулькы по Пряшові своі пережытя, повязаны з тыма короткыма студиями. Не обыйде ся без презентациі фотоґрафій з того часу, але тіж красы карпатской природы, музеів, русиньскых шкіл, інституций, ци забытковых деревяных храмів. Так як на стрічы в Пілнійній Каролині студентка навчыт охочых пару слів з русиньского языка.

В рамках стрічы одбуде ся і ґенеалоґічна доповід, котру выголостит Кріс Блек (Chris Black). То досвідчений в досліджаню ґенеалоґіі (в тым русиньской) через провіріня вельох архівальных джерел, а при нагоді допоможе каждому, хто буде мал дяку, зрозуміти приципы гляданя предків, та локалізуваня своіх коренів. Орґанізаторы заявляют, же сміло мож приностити копіі родинных документів та листів, котры в міру можности переведе і пояснит прелеґент. Про місто Пряшів і його значыня в минулым як і теперішнім Русинів – за мотузком.

Паралельно до стрічы в Джорджіі, західній одділ Карпаторусиньского Общества в Пілнічній Каролині просит на цілоденне школіня, на котрым буде мож ся навчыти печы традицийны різдвяны кістa. Різдвяна кулинарна обшыр буде тыкала тіж школіньовой стрічы в грекокатолоцкій парохіі св. Йоана Крестителя в Пармі, де участникы познают таємниці варіня різдвяных страв. За деталями позерайте на фейсбуковы анонсы подій в Ешвіль (Пілнічна Каролина) і Пармі (Огайо).

фот. горі: будинок Театру Александра Духновича; скрін google.pl/maps