В Мукачові бісідовали о ролі містных еліт і інтеліґенції в розвитку державы. Припомянули Русинів і референдум

Як інформовав Степан Сікора на порталі Mukachevo.net, 26-го новембра 2021-го року в Мукачові одбыв ся округлый стіл на тему Роль містных еліт і інтеліґенції в розвитку державы.

Округлый стіл быв орґанізованый головов Закарпатьского одділіня Общества адвокатів Україны Ларисов Холмогоровов, і головов Рады адвокатів Закарпатьской области Олексійом Фазекошом. На події взяли участь знамы адвокаты з области, депутаты Закарпатькой областной рады, журналісты, блоґеры і гості.

Меджі участныма были і представителі русиньского руху на Україні, як наприклад шефредактор порталу Фенікс – Слово Степан Сікора, і голова Народной рады Русинів Закарпатя Євген Жупан. Тоты на округлім столі одкрыли і тему Русинів а референдума з 1-го децембра 1991-го року, котрого резултаты доднесь не были выповнены.

Люди голосовали за самосправну теріторію

„1-го децембра 2021-го року буде 30 років од всеукраїньского референдуму, на котрім майже 98 процент Закарпатців повіло ‚так‘ незалежній Україні, і майже 78 процент заголосовало за ‚самосправну теріторію Закарпатя в складі Україны‘. Парадокс? Ніт. Закарпатці, і то Українці, Росіяны, Русины, Мадярі, Румуны, захотіли жыти в незалежній, демократічній державі Україні, і жебы ‚центер‘ то решпектовав і дав можливости нашій области розвивати ся з оглядом на шпеціфікы реґіону,“ повів Сікора на округлім столі.

Сікора думать, же реґіон Закарпатьской области, котрый має граніцю із штирьома країнами Европской унії, треба поважовати за якусь основну базу, з котрой почінать „европска Україна“.

„Потрібным є зліпшовати економічну, гуманітарну інфраштруктуру области. Не є таємніцьов, же понад 60 процент роботыспособного і інтелектуалного населіня краю робить за граніцьов, а має робити дома,“ продовжовав Сікора.

Вызнаня Русинів підниме авторіту Україны

Заслуженый лікарь Україны, кандідат медициньскых наук і голова Народной рады Русинів Закарпатя Євген Жупан звернув увагу на проблему того, же Русины не суть вызнаны на Україні.

„Русины як народность суть вызнаны в Европі і у світі, а лем на Україні їх не видять. Вырішіня ‚русиньской проблемы‘ лем підниме авторіту Украіны як европской державы,“ повів Жупан. Як далше высловив ся на округлім столі, Закарпатя є єдиным реґіоном Україны, де в мірі і злагоді вже тісячі років жыють представителі понад трьох десяток різных етнічных ґруп.

Фото: Степан Сікора / Mukachevo.net.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА