В Мадярьску тот рік День Русинів в Еґері

До Еґеру кличуть тот рік мадярьскы Русины святковати День Русинів. Торжественный проґрам одбуде ся 26-го мая 2018-го року і зачне Божественнов літурґійов в еґерьскый Базиліці.

День Русинів є в Мадярьску выголошеный на 22-го мая. Тот день у 1703-ім році Томаш Есе в Береґсасі підняв прапор і залучів підкарпатьскых Русинів до освободженецькой войны Ференца Ракоція ІІ. Ракоцій пізніше назвав Русинів за їх вірну службу Gens fidelissima – найвірнішым народом.

Головным орґанізатором події вже традічно є Вседержавноє Русинськоє Самосправованя і покровительство над святом тот рік перевзяв Міклош Шолтис, державный секретать із реліґіозных вопросів, народностных і цівілных повязань Міністерства робочіх жрідел.

Головный проґрам буде проходити од 13.00 год. в просторах авлы середньой школы при Універзіті Карола Естергазія. Участным приговорить ся Віра Ґіріц, посланкыня за Русинів у мадярьскім парламенті, Віктор Крамаренко, котрый є председом цілодержавного самосправованя Русинів в Мадярьску і Ласло Гобіша – пріматор (мер) міста Еґер. Участны можуть тішыти ся на музичный проґрам. Выступати буде фолклорный ансамбель Бабчина співаночка і солістка Лілія Немеш, котры прийдуть із Підкарпатя. Комплетный проґрам мож видіти під статьов на плаґаті.

В Мадярьску творять русинську комуніту автохтонны Русины, котры на тых теріторіях жыли цілы столітя, як і переселенці, головно із Підкарпатя, якы там пришли за роботов і зістали там. За остатнім переписом населіня, котре проходило у 2011-ім році, приголосило ся 3882 людей ку Русинам. Ку русиньскому материньскому языку голосило ся лем 999 людей.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА