В Мадярьску Русины голосовали у выборах до меншыновых самосправовань

В неділю 9-го юна 2024-го року в Мадярьску вєдно із выборами до Европского парламенту проходили і комуналны выборы в селах і містах, а так само і меншыновы выборы. Народностны меншыны собі в них на новый функчный період выберали представителів своїх самосправовань.

Русины, як єдна із офіціално вызнаных народностных меншын, так само голосовали. Змагали ся меджі собов головно дві кандідачны спискы, лем в Будапешті были і кандідаты Русиньского културного союзу.

Ішло о кандідачны спискы Общества русиньской інтеліґенції імени Антонія Годинкы (ОРІАГ), котре веде голова Світового конґресу Русинів Штефан Лявинець, і Общества Русинів/Рутенів Мадярьска (ОРМ). Общество Русинів/Рутенів Мадярьска потвердило свою домінанцію у выборах, хоць окремы округы в Будапешті здобыли і Годинковці.

Вседержавне русиньске самосправованя в руках ОРМ

5102 людей могло брати участь на меншыновых выборах в котрых ся выберав новый склад Вседержавного русиньского самосправованя, дві теріоторіалны самосправованя і вшыткы містны самосправованя. О право голосовати приголосило ся 3905 людей.

До выборів членів Вседержавного русиньского самосправованя (ВРС), як найвысшого самосправного орґану, котрый має 15 членів, были приголошены дві кандідачны спискы. Список ОРІАГ вів Штефан Лявинець, і было на нім 14 кандідатів. Список ОРМ вів Віктор Карамернко, котрый і теперь є шефом ВРС, і было на нім 15 кандідатів.

ОРМ здобыло у выборах 11 мандатів, штири зістали ОРІАГ. Значіть, ОРМ далше буде рядити Вседержавным русиньскым самосправованьом, кедьже має комфортну векшыну.

За ОРМ были выбрати на далшый функчный період Віктор Крамаренко, Янош Кожняньскый, Янош Соноцькый, Олґа Сілцер-Ликовіч, Йожеф Мудро, Базіл Мигаль Теленков, Ґабор Варґа, Евелін Скіба, Віктор Ґіріц, Петро Гладинець і Віктор Дулишковіч. За ОРІАГ здобыли мандаты Штефан Лявинець, Андраш Головацькый, Татяна Ерделі і Мигаль Танчинець.

Выберали і дві областны самосправованя

Русины выберали і дві областны самосправованя. В Областнім русиньскім самосправованю Боршодьско-Абовско-Земпліньской жупы з центром в Мішколці было 7 мандатів. Шість мандатів здобыло Общество Русинів/Рутенів Мадярьска, лем єден мандат здобыло Общество русиньской інтеліґенції імени Антонія Годинкы.

В Будапешті при выборах членів Столичного русиньского самосправованя то было тісніше. Із семох мандатів 4 здобыло ОРМ, 3 мандаты припали ОРІАГ, але ОРМ має векшыну і там.

Містны самосправованя векшыново в руках ОРМ

В руках Общества Русинів/Рутенів Мадярьска зістала і векшына містных самосправовань, де будь здобыли мандаты лем їх кандідаты, або мають векшыну. Кандідаты Общества русиньской інтеліґенції імени Антонія Годинкы здобыли наприклад Маріяповч, Печ і Кішварду. Вшыткы остатні села і міста має ОРМ.

Векшый успіх мало ОРІАГ в Будапешті, в рамках выборів до самосправовань в окремых районах столиці. Русиньске самосправованя там є у 18-ох районах. Майже у вшыткых районах суть резултаты такы, же вшыткы мандаты здобыв єден список. 10 районів буде рядити Общество русиньской інтеліґенції імени Антонія Годинкы, 5 районів здобыло Обществo Русинів/Рутенів Мадярьска, а три районы будуть в руках Русиньского културного союзу.

Натеперь іщі самоспоравованя будуть фунґовати в старім складі, новы мандаты зачнуть платити восени.