В Лютині буде выстава фотоґрафій із навщівы Папы Франціска на Словакії

Як інформовала Пряшівска ґрекокатолицька архієпархія, в стародавнім путницькім місці ґрекокатоликів – в Лютині, буде одкрыта выстава фотоґрафій із навщівы Святішого Отця Франціска на Словакії.

Выставу орґанізує містна парохія вєдно із Обществом хрістіансьскых фотоґрафів Чоловік і Віра. Їй святочне одкрытя одбуде ся в неділю 14-го апріля 2024-го року, і буде єй мож посмотрити в просторах Ґалерії Мікулаша Климчака до 25-го мая.

В день одкрытя выставы в лютиньскій базиліці кір Йона Максим, пряшівскый архієпіскоп і митрополіта одслужыть архієрейску літурґію, по котрой скінчіню буде участный і на вернісажи в ґалерії, котра стоїть в путницькім ареалі коло базилікы.

Понад 60 фотоґрафій

Выставу творить 66 великоформатовых фотоґрафій, котры документують найважнішы моменты з навщівы Папы Франціска на Словакії у 2021-ім році. На выставі бере участь тринадцять членів общества фотоґрафів, котры документовали нелем навщіву, але і супроводный проґрам, приправы і роботу добровольників, як і дяковну путь віруючіх із Словакії у Ватікані.

Як пишуть орґанізаторы, Общество хрістіаньскых фотоґрафів Чоловік і Віра має своє походжіня в Чеській републіці, де выникло у 2011-ім році. За куртый період кількость членів значно наросла і общество почало діяти і в далшых країнах як Польща, Мадярьско, Еґіпт а Словакія, де є моментално 30 членів.

Покровительство на выставов перевзяв кошыцькый римокатолицькый архієпіскоп і митрополіта Бернард Бобер, котрый є єдночасно председом Конференції єпіскопів Словакії. Выстава пізніше попутує до Дому святой Єлизаветы у Кошыцях, Спішской Капітулы, Шаштіна і наконець буде выстава приступна в Катедралі святого Мартіна в Братіславі.

Папа одслужыв меджі ґрекокатоликами літурґію

Папа римскый Франціск почас свойой навщівы в септембрі 2021-го року навщівив і Пряшів, де ся стрітив із ґрекокатолицькыма віруючіма. До Пряшова пришов 14-го септембра, коли в літурґічнім календарі маєме праздник Воздвиженія Честного Креста.

Веселеньскый Архієрей історічно в місті, в котрім має свій центер Ґрекокатолицька митрополітна церьков на Словакії, быв головным служытельом літурґії у восточнім обряді, а так само мав і проповідь.

Быв то другый Папа римскый, котрый пришов до Пряшова меджі ґрекокатоликів. Першым быв Йоан Павел ІІ., котрый навщівив тото місто в році 1995. Молив ся втогды і в Ґрекокатолицькім катедралнім соборі святого Йоана Крестителя на гробі русиньского єпіскопа, священомученика Павла Петра Ґойдіча, якого о шість років пізніше выголосив у Ватікані за блаженого.