В літературнім конкурзі найліпшый твор Мірослава Жолобаніча

В пятніцю 30-го децембра 2022-го року в просторах Інштітуту русиньского языка і културы Пряшівской універзіты в Пряшові одбыв ся семінар, на котрім были выголошены резултаты 9-го річника Літературного конкурзу Марії Мальцовской.

Фахова журі, котру вів Михал Павліч і далшыма членами были Кветослава Копорова і Аліца Вєтошевова, тот рік оціньовала творы шестьох авторів. „Того року до конкурзу послало свої творы менше авторів, як то бывать по іншы рокы, але умелецька уровень вшыткых посланых творів ся підняла,“ інформовав председа пороты Павліч.

Што до жанрів, тот рік были загнаны поетічны і прозаічны творы, драматічный текст ся на конкурзі не появив.

На третім місці тот рік скінчіла Марія Шмайдова з пригодами про найменшых під назвов Під диков грушков. Друге місце заняла Людмила Шандалова з творами в жанрі інтімной поезії. Найліпшым твором загнаным до 9-го річника Літературного конкурзу Марії Мальцовской стала гуморістічна проза Мірослава Жолобаніча з назвов Піняженка.

Міро Жолобаніч (1956 р.) молоды рокы пережыв у Пчолинім, Сниньского окресу. Ґімназію закінчів у Снині, пак продовжовав штудії на Філозофічній факулті Універзіты Павла Йозефа Шафарика в Пряшові. Робив высокошкольского педаґоґа, але і педаґоґа про арештантів. Моментално є у выслуговій пензії. Жыє в Кошыцях.

Дотеперь му по русиньскы вышли три книжкы афорізмів доповненых карікатурами: Хто ся сміє, є одважный із 2017-го року, Хто ся сміє, є мудрый із 2018-го і книжка Хто ся сміє, є здравый, яка вышла в році 2019. В році 2021 му вышла книжка гуморістічной прозы з назвов Захранка. В році 2022 выдав книжку Дуплава верьба. Лавреатом Літературного конкурзу Марії Мальцовской уж быв у 2020-ім році.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА