В Кракові здіґітализували книгы зо списами похованых на Раковицкым Цмонтери. Мож найти м.ін. Емілияна Чырняньского

В Кракові закінчыл ся процес діґітализациі черговых томів цмотнерных книг, што тыкают осіб, якы похованы сут на Раковицкым Цмонтери в ХІХ і ХХ ст. Медже нима сут тіж Лемкы.

Мож перезерати індексы вмерлых до 1921 рока та денникы вмерлых до 1922 рока. Процес діґітализациі проходит етапами, на основі догваріня медже Зарядом Комунальных Цмонтерів (ЗКЦ) в Кракові з Ягайлоньском та Воєвідском Бібліотеками. ЗКЦ зачал процес скануваня і одквашаня книг в 2021 році.

Під руком о каждій порі і з каждого місця на світі

Ефектом першого догваріня з Ягайлоньском Бібліотеком была діґітализация цмонтерных книг до 1900 рока. То разом 44 томы вагы 115 кґ. В дальшым етапі обробили 43 томы – разом 8203 карты о масі 155 кґ. Карты до 1922 рока зосканували до файлів TIFF якости 300 ппі. Результаты робіт – індексы вмерлых до 1921 рока та денникы вмерлых до 1922 рока – мож перезерати дармо на плятформі Малопольской Цифровой Бібліотекы mbc.malopolska.pl.

ЗКЦ в Кракові єст єдным з першых в Польщы, котрый піднял ся діґітализациі цмонтерных книг. ЗКЦ при нагоді припоминат, што сучасны краківскы книгы од 1. січня/януара 2021 р. ведены сут в електронным системі, але «што якісый час сут друкуваны для додатковой безпекы ресурсів, што мают вічный характер».

Мож найти аж і номер гробу похованых на Раковицкым Цмонтери Лемків

Серед вписів в книгах находит ся м.ін. тот, што односит ся до выдатного Русина, проф. Емілияна Чырняньского, бывшого ректора Ягайлоньского Університету. З впису в книзі мож ся донзати м.ін. про точне положыня місця похованя: ознакуваня кватеры, номер ряду, аж і номер гробу. Подана є тіж парохіяльна приналежніст, вік вмерлого та дата смерти і дата похованя. При проф. Чырняньскым є записок, што поховали до в гробі Шафраньского.

Діґітализация цмонтерных кныг і іх удоступніня в інтернеті має служыти утырваліню істориі Кракова і його бывшых жытелів. Беручы до увагы, што в другій половині ХІХ ст. лем на Ягайлоньскым Університеті студиювало веце як піл соткы русиньскых студентів (полный реґістер з короткыма біоґрамами найдете в дописі проф. А. Зємбы пн. Narodowość ruska na Uniwersytecie Jagiellońskim: analiza prozopograficzna studentów obrządku greckokatolickiego z obszaru Rusi łemkowskiej, 1851-1918, печатаным в «Річнику Руской Бурсы» на 2016 рік), а част з них остала в місті робити карєру, можеме ся сподівати, што веце лемківскых персон было похованых на Раковицкым Цмонтери.

Здіґітализуваны книгы можут быти помічны при ведіню ґенеалоґічных робіт.