В Кошыцях одпремєровали філм о Варголови

Од 16-го до  23-го юна 2023-го року проходить в Кошыцях вже 29-ый річник меджінародного філмового фестівалу Art Film Fest. Почас вісем фестіваловых днів мала публіка можливость видіти 146 філмовых продукцій із штирьох контінентів світа.

Якраз на Art Film Fest было мож видіти в четверь 22-го юна і цілосвітову премєру нового ціловечурнього документарного філму з назвов Енді Варгол – америцькый сон (оріґ. Andy Warhol – americký sen). То філм режісера Яна Любоміра Сливкы і сценарісткы Петры Бабіч Сливковой.

Копродукчным партнером нового філму є Музей модерного уменя Енді в Варгола Меджілабірцях. Філм на фестівал пришов представити єден із протаґоністів, сын брата Енді Варгола, вызначный книжковый ілустратор Джеймс Варгола, котрый пришов із Споєных штатів Америкы із свойов женов.

Як повіли творцьове документарного філму про Rádio Devín, Енді Варгол – америцькый сон дістане ся до дістрібуції аж в осени 2023-го року. В Кошыцях быв премєрованый як Work in Progress, значіть іщі в процесі выробы.

Як дочітаме ся в анотації філму, Енді Варгол – америцькый сон є о жывоті і ділі єдного з найвекшых світовых художників з корінями у селі Микова на выході Словакії.

„Інтімна історія родины Ендія, просаджіня ся на ню-йорскій умелецькій сцені, здобытя світовой славы і овпливніня умелецькых штілів через многы жанры. То вшытко выповіджено посередництвом выповідей членів родины і знакомых, меджінародных фаховців і кунстісторіків. Доповнюють їх автентічны знимкы зо жывота Ендія на двох контінентах,“ пишуть творцьове документарного філму.

Філм точів ся в Миковій, в Меджілабірцях, але і в Піттсбурзі а на далшых місцях на двох контінентах. Вдяка Джеймсови Варголови ся філмовый штаб дістав і до родного дому Енді Варгола. Як повів режісер філму про денник Korzár, то, о чім є філм, ся дає выразити бонмотом, котрый Енді Варгол радо хосновав: „I am from nowher”, значіть „Єм нивыдкы“.

Дефінітівна подоба бы мала быти така, же про телевізію з того будуть два філмы, а як повів режісер Сливка, матеріалу мають тілько, же бы хотіли пак зробити іщі третій філм, котрый бы мав быти о співпрацовниках Варгола, і о його жывоті по атентаті.

Фото: TASR.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА