В Коросні одбуде ся наступний Лемківскій Вечер

То уж четверта едиция подіі, котра крыє ся під наголовком Лемківскій Вечер. Три послідні стрічы, котри зачали ся одбывати частійше як раз на рік, принесли нам спомины о давній Лемковині, припомнули стару традицию собіток, або односили ся до любови і любуваня. Нерозлучном частю коросняньскых Лемківскых Вечерів была лемківска музыка, стрічы з Лемками, лемківска кухня і вельо цікавых оповісти.

Лемківскій Вечер помалы зачынат ся вписувати в ґрафік цікавых культуральных акций Коросна і тішыт ся великом популярністю, зато орґанізаторы на разі не зміняют конвенциі стрічы. Найблизшу едициую зас поведе др Тадеуш Лопаткєвич – етноґраф, доктор гуманістычных наук з обшыри наук о штуці, забыткознавця, реґіоналиста, автор і спілавтор вельох книжок і парудесятьох дописів, тыкаючых ся етноґрафіі Карпат, інвентаризациі і охороны забытків, істориі штукы, специялиста істориі лемківской каміняркы. І тым разом выступлят артисты з А де то давнійше строіло – молодого, але уж успішні концертуючого по вельох сценах фольк-рокового ансамблю, котрий за дост короткій період істнуваня може ся похвалити награньом платні «Хыжа», заквалифікуваной до офіцийной преселекциі нагороды Фридериків 2016, участю в інтернетовым голосуваню Віртуальны Гушлі на найліпшу фолькову платню, але тіж выріжніньом і Нагородом Президента Міста Люблина вчас ХХV Медженародового Фестівалю Фольковой Музыкы «Фольковы Миколайкы» в 2015 р. Фронтменками ансамблю сут дві співаючы сестры, Лемкыні – Анна Романьчак-Поляньска та Сабіна Романьчак. Свій репертуар в великій мірі операют на лемківскій корінній музыці.

Четверта едиция імпрезы Лемківскій Вечер, названой «Стрічы на Бескіді», одбуде ся в Барі «Моніка« в Коросні в найблизшу пятницю 2. вересня/септембра о 19.30 год. Участникы акциі будут мати змогу порібувати лемківскых страв і стрітити запрошеных гостів. Уж тепер мож резервувати білеты – дрібниці на плякаті.