В Команчы празднували 100. річницю отриманя автокефалиі ПАПЦ

«Пришли сме до церкви, жебы подякувати за 100 років незалежности Польской Автокефальной Православной Церкви» – повіл для esanok.pl владыка Паісий вчас торжества, якє прошло в суботу 9. листопада/новембра 2024 р. в церкви Покровы Пресвятой Богородиці в Команчы.

«Не підлігаме під никого і никому, окрем Господа Бога» – дополнил єпископ. Торжества в Команчы проходили в ден свята Преподобного Нестора Літописця.

Божеску літургію очолювал архієпарха Паісий, ординарий ґорлицко-перемышльской єпархіі при асисті священників саноцкого деканату та ґорлицкого декана о. митр. Романа Дубеца. Присутны на торжестві были і представникы самоурядовых власти, на челі з війтом ґміны Команча Романом Бздиком, локальных інституций та чысленні згромаджены місцевы жытелі ріжных конфесий.

«В нас сут штырі конфесиі і мы ся вшыткы згаджаме» – повіл Йоан Гаргай, церковный в команецкій парохіі. «Жыєме сой спокійні і єст нам добрі. Дякуєме за тото державі, в котрій жыєме, так само ґмінным і дальшым властям».

«Тішыме ся з того торжества. Наша ґміна є барз зложена» – коментувал війт ґміны Команча др Роман Бздик. «Днешні торжества прошли в цекрви в Команчы, тій найбарже популярній, зараз по церкви Юнеско в Туряньску. Барз ся тішыме, же тоты церкви жыют, же не сут то лем архітектонны обєкты на Пути Деревяной Архітектуры, памятниковы обєкты, але предовшыткым, же они жыют. Тішыме ся, што сут парохіяне, котры святкуют тото великє торжество» – повіл.

В рамках празднуваня при церкви поставили і посвятили крест та памятну таблицю на камени. Скорше проповід выголосил місцевый парох, о. митр. Юлиян Феленчак. Звернул він увагу, што отриманя незалежности Церкви в Польщы было можливе завдякы одзысканю незалежности через державу, а тіж побожности і духовой дозрілости православных прожываючый в границях Польщы. Торжествам товаришыла выстава «100-літя автокефалиі Польской Православной Церкви в Польщы», котру мож было скорше видіти на конференциі в Ґорлицях.

Торжество было тіж нагодом до вручыня одзначынь. За роботу на хосен Цекрви в році Ювілею Православной Автокефальной Церкви в Польщы медалями Св. Максима Ґорлицкого одзначены были: о. прот. Михал Коник, вікарий команецкой парохіі, вірны: Йоан Гаргай та Йоан Лайкош. Бурмайстра ґміны Команча Романа Бздика нагородили грамотом благословліня.

«Коли в 2006 році церков в Команчы згоріла, то бесідували товды, што одлетіла душа Команчы» – повіл о. Юлиян Феленчак, парох парохіі в Команчы і Морохові. «І днес, коли маме уж 18 років по тым, як сме одбудували церков, 14 років одколи сме єй посвятили, 100 років од отриманя автокефалиі, присутніст владыкы Паісиія, якій очолювал Божеску Літургію, самоурядовых власти, пресдтавників ріжных інституций, духовных, братів і сестер, вказує же християньскы вартости, взаімна пошана і християньска любов сут гев наштоден присутны в нашым жытю» – скоментувал священник.