В Клокочові праздновали Покровительку Земпліна

Уж по другый раз в календарі Ґрекокатолицькой церькви на Словакії припоминав ся праздник з назвов Память чудотворной Клокочівской іконы Пресвятой Богородіці, Покровителькы Земпліна.

З той нагоды в неділю 8-го октобра 2023-го року одбыв ся у тім стародавнім маріяньскім путницькім місці на нижнім Земпліні єпархіалный одпуст Кошыцькой єпархії. Інформовав о тім Пресовый центер Кошыцькой єпархії. Праздник є присвяченый чудотворній іконі, котра перед веце як 350-ма роками слызыла.

Участный єпарха і емеріта

Перед торжественнов літурґійов віруючі помолили ся ружанець і Акафіст ку Пресвятій Богородіці. Архієрейску літурґію одправляв архієпіскоп Кіріл Васили, кошыцькый єпарха, котрый мав і проповідь, а вєдно з ним служыв кошыцькый ємерітный єпарха владыка Мілан Хаутур, як і далшы священици а діаконы.

В рамках літурґії владыка Кіріл уділив званя протоєрея і право носити набедерник і золотый крест отцьови Петрови Чінталови, містному парохови, за його роботу на розвиток путницького місця і реалізацію Путницького дому в Клокочови, котрый в половині септембра того року посвятив ватіканськый державный секретарь кардінал Піетро Паролін, якый пришов на навщіву Клокочова, жебы оддати почливость і поклонити ся Клокочівскій Богородіці.

По літурґії наслідовав іщі Молебен ку Клокочівскій іконі, котрый одправляв емерітный єпарха Мілан Хаутур.

Праздник Покровителькы Земпліна

Праздник Покровителькы Земпліна быв установленый Декретом Конґреґації про восточны церькви (днесь Дікастерія про восточны церькви), котрый быв выданый у Ватікані 21-го децембра 2020-го року. Стало ся так на основі жадости втогдышнього митрополіты Пряшівской метрополії sui iuris архієпіскопа Йоана Бабяка і Рады єрархів Пряшівской митрополії, при нагоді 350-ой річніці слызіня Клокочівской іконы.

Зробили так підпорены жадостями пріматорів і містьскых заступительств вышнього і нижнього Земпліна, як і підпорныма писмами Монс. Бернарда Бобера, кошыцького римокатолицького архієпіскопа-митрополіты, і владыкы Ґеорґія Страньского, православного архієпіскопа михалівско-кошыцького.

Дектрет становив, же новый праздник ся буде каждый рік святковати першу неділю місяця октобер. В припаді, же на першу октоброву неділю припаде 1-ый октобер, што є праздник Покровы Пресвятой Богородіці, як тому было і тот рік, Клокочівска ікона буде праздновати ся слідуючо неділю – другу в октобрі.

Клокочівску ікону Папа римскый Франціск 14-го септембра 2021-го року, по архієрейскій Літурґії св. Йоана Златоустого, котрой быв головным служытельом в Пряшові, торжественно коруновав.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА