6. вересня/септембра 2024 р. выполнило ся 110 років од мученической смерти о. Максима Сандовича, канонізуваного Собором ПАПЦ в 1994 р. Текучый рік є і роком памяти о початках поневоліня галицкых Русинів (в тым чыслі з Лемковины) австрийскыма властями в концетрацийным лаґрі в Талергофі.
З той нагоды еміґрацийны кругы в ЗША, зосереджены при Карпаторусиньскым Америцкым Центрі Lemko Hall (Carpatho-Rusyn American Center Lemko Hall), зышли ся в неділю, 8. вересня/септембра, штобы молитовно спомнути священномученика Максима Ґорлицкого і припомянути історичны діі з років 1914-1917.
Подія проходила в православній церкви св. Мариі в Йонкрес, яка належыт до русиньской єпархіі в юрисдикциі Константинопольского Патріархату. В храмі был одслуженый Молебен до св. Максима.
«Пак мали сме чудову презентацию о жытю св. Максима (Сандовича), котру вюл діакон Давид Дутканич. Вшыткы, што ся зышли, слухали з великом увагом. Подія была великым успіхом. Горджу ся тым, же повело ся мі тото зорґанізувати. На подію зышло ся около пятдесятьох слухачів» – повіл в короткій бесіді з нашом редакцийом Андрий Медвід, еміґрацийный лемківскій діяч.
В Йонкрес і околичных місцевостях доднес прожывают потомны выхідців з Лемковины. Мают они інтерес о лемківску історичну памят, прото тіж орґанізуваны сут подіі як тота посвячена лемківскому святому. В марци т.р. лемківскы еміґрацийны кругы в Йонкрес припомнули історию Лемківской Республикы.
![](https://www.lem.fm/wp-content/uploads/2024/09/2b3f374a-cebc-42c6-a921-570e6e369e95.jpeg)