В Гуменнім проходить выстава Карпатьска писанка 2024

І тот рік Вігорлатьскый музей в Гуменнім у співпраці із Окреснов орґанізаційов Унії жен Словакії зорґанізовали вже 32-ый річник меджінародного конкурзу Карпатьска писанка 2024. Выстава із тогорічного конкурзу была одкрыта 7-го марца 2024-го року у Выставній салі Ореста Дубая.

Уж 32 років приносить конкурзна выстава Карпатьска писанка розмаїту і фаребну плеяду писанок, як інформовала Вероніка Латтова із Пресового одділіня Містьского уряду в Гуменнім. Тот рік мож на выставі видіти довєдна 560 писанок од 59-ох авторів, котры до конкурзу приголосили ся.

Окрашены яєчка до Карпатьской писанкы 2024 посылали нелем реґіоналны і словацькы художници, але і автoры з Мадярьска, Польщі і Україны.

„В минулости мало маґічне значіня таке яйце, котре было ціле, не мало діры. Днесь вже іде о естітічну, респектівно окрасну функцію. Зато за традічны технікы береме такы, котры не перфоровали шкапулу, наприклад віскова батіка, вышкрябованя, дротованя або обліпльованя. До модерных належыть мадеіра або ся хоснують полістіреновы яйця при патчворку, пластіковы формы, но найдеме і медовниковы або гачкованы. Люди експеріментують і комбінують традічны і модерны технікы,“ пояснив Йозеф Фундак, етноґраф Вігорлатьского музея.

Першы крашены яєчка нашли ся уж при археолоґічных выкопавках у Еґіпті, в Перзії, пізніше в Европі. Вігорлатьскый музей выставлює так само репліку писанкы із 15-го столітя, котру обявили при Львові.

Тогорічну Карпатьску писанку 2024 оціньовала тричленна журі в складі Марош Демко, Марія Мішкова і Даґмар Унґрадійова. Выставу буде мож у Вігорлатьскім музею видіти до 21-го апріля того року.

Фотоґрафії: humenne.sk