В Гуменнім дітей учіли робити писанкы

Од 8-го марца до 6-го апріля в просторах Вігорлатьского музею в Гуменнім мож видіти вже 26-ый річник выставкы Карпатьска писанка 2018 (Кarpatská kraslica 2018), котру приготовив музей вєдно із Унійов жен Словакії в Гуменнім і Централов народной умелецькой выробы (Ústredie ľudovej umeleckej výroby).

83 авторів і коло 800 писанок

В актуалнім річнику, до котрого залучіло ся 83 авторів зо Словакії і заграніча і мож в рамках нього видіти приблизно 800 писанок, суть експонаты документуючі уменя крашіня писанок з майже вшыткых реґіонів Словакії і не бракують атрактівны колекції з теріторії Польщі і Україны.

„Інтересностьов актуалного річника выставкы є пожычена репрезентачна колекція писанок зо збірок Музею народной умелецькой выробы в Ступаві і презентація колекції найстаршых писанок з традічныма техніками крашіня із етноґрафічного збіркового фонду Вігорлатьского музею в Гуменнім. Частьов той колекції є і копія шісторічной писанкы, котру Вігорлатьскому музею даровав партнерьскый Народный музей народного уменя Гуцулщіны в місті Коломия,“ інформовала редакцію Яна Федічова із гуменьского музею.

„Выставльованы писанкы як прояв традічного народного уменя суть днесь вказаньом высокой умелецькой здібности і єдночасно зодповіднов формов анґажованости в намазі о утримательность, охорону і іновацію културной дідовизны,“ продовжує далше Федічова.

Вігорлатьскый музей за орґанізованя выставкы писанок і підпору културных традіцій здобыв у 2017-ім році оцініня Краєзнавочого общества Словакії (Národopisná spoločnosť Slovenska).

Творчі ділні про дітей

Карпатьска писанка 2018 має і свою інтерактівну часть. В рамках ньой роблять ся творчі ділні про школы і окремы інтересуючі ся особы, на котрых учать робити писанкы, традічныма, но і іноватівныма методами.

В понедільок 19-го марца были на творчіх ділнях школярі гуменьской основной школы на Пуґачевовій уліці. Як робити писанкы, дітям вказав робітник Музею Михал Пастернак, котрый тій залюбі присвячать ся вже дакілько десяток років. Діти могли научіти ся методу батікованя, рельєфного воскованя і дротованя, но і мачаня в різных одварах.

Як повів про пресову аґентуру ТASR Пастернак, він найчастіше робить першов техніков. Даколи ся за його словами хосновали коло батікованя найвеце дві фарбы фарбы, він комбінує штири. Сам ся до выставкы залучать вже 25 років. Цільом того, же в рамках выставкы робить про дітей і дорослых творчі ділні, на котрых учіть як робити писанкы, є познакомити шыроку верейность з тов традічнов творчостьов.

„Єм несподівана, бо іщі і в сучасности є все доста великый інтерес о крашіня традічных писанок. Тоты творчі ділні суть у Вігорлатьскім музею приготовльованы реґуларно і каждым роком стрічаме ся із позітівныма реакціями,“ повіла про TASR робітничка ґалерійного одділіня музею Дана Катанікова.

В рамках выставкы Карпатьска писанка 2018 одбуде ся і бурза, де буде мож купити собі зо шырокого выберу. Бурза одбуде ся в просторах музею 27-го марца од 8.00 до 12.00 год.

Жрідло фотоґрафії: TASR

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА