В Ґреції проходить стріча восточных католицькых єпіскопів

Як інформує Пресова аґентура Конференції єпіскопів Словакії (TK KBS), в понедільок 18-го септембра 2023-го року в місті Неа Макрі, в Ґреції, почала далша із реґуларных стріч восточных католицькых єпіскопів Европы.

Стріча орґанізуає ся під покровительством Рады европскых єпіскопскых конференцій. Домашнім єпіскопом, котрый гостить европскых владыків, є апостольскый екзарха в Ґреції Мануіл Нін.

Словакію на стрічі репрезентує архієпіскоп Кіріл Василь, кошыцькый єпарха, і владыка Мілан Лах, помічный єпіскоп Братіславской єпархії. Присутны суть і далшы єпіскопи традіції Ужгородьской унії, як наприклад владыка Ґеорґій Джуджар, єпархіалный єпіскоп Єпархії святого Николая в Руськім Керестурі, ці владыка Атаназ Орос, мішколцьскый єпарха з Мадрярьска.

Стріча почала приговорами владыкы Мануіла Ніна, апостольского екзарху про католиків візантійского обряду в Ґреції, і єпіскопа Яна Павсловского, апостольского нунція в Ґреції.

На одкрытю взяв участь і отець Мішел Ялах, маронітьскый священик, котрый є од фебруара новым секретарьом Дікастерії про восточны церькви в Римі, як і єпіскоп Ґінтарас Ґрушас, архієпіскоп у Вільнюс і председа Рады єпіскопскых конференцій Европы.

Владыка Мануіл Нін звернув увагу на факт, же тота стріча проходить з нагоды сторічніці приходу попередників з Константінополя до Афін в роках 1922 аж 1923 вєдно з єпіскопом Ґероґійом Калавасісом, котрый у 1932-і році став першым екзархом в Ґреції.

„Перевістно ґреческый, наш екзархат, є днесь у віці сто років екзархатом, досправдовов Церьквов, котра вже не є лем ґреческа, але за остатніх пятьдесять років ся збогатила о два етнічны а передовшыткым церьковы факты, котры єй збогатили і далше збогаючують, і то о віруючіх халдейской традіції з Іраку і Сірії, а україньскых віруючіх візантійской традіції,“ повів владыка Мануіл.

„Будуть то дні молитвы, роздумованя, познаваня і діліня ся. Про нас вшыткых то будуть досправды сінодалны дні,“ продовжовав владыка з тым, же окремо будуть памятати на Католицьку церьков візантійской традіції на Україні, „і на цілый україньскый народ в тім часі несправедливой войны.“

Стріча восточных католицькых єпіскопів закінчіть ся в четверь 21-го септембра. Почас окремых засідань мають єпіскопи принагоду діскутовати о тім, яку мають роль і місце восточны католицькы церькви в сучаснім світі, причім будуть брати до увагы різны вызвы, котры суть перед Католицьков церьквов, наприклад і в подобі войны на Україні.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА