В Ґорлицях розбудуют державну дорогу но 28

Брак тротуарів, небезпечне скрижуваня. То ся має змінити. Перебудуют державну дорогу но 28 в Ґорлицях. Ґенеральна Дирекция Державных Доріг і Автострад оголосила конкурс оферт на опрацуваня проєкту.

Державна дорога но 28, яка веде през Ґорлиці, то барз ожывлена як іде о рух артерия. Веде транзитовый і туристичный рух в страну границі державы в Медиці од Затора через Вадовиці, Рабку, Лиманову, Новый Санч, Ґорлиці, Ясло, Коросно, Санок, Кузьмину, Бірчу і Перемышль. Веде рух близко теренів з великыма туристичныма приметами, м.ін. близко Нацийональных Парків: Маґурского ци Бєщадского.

Фраґмент, котрый перетинат Ґорлиці чыслит веце як 7 кілометрів. В самым місті дорога творит барз небезпечне місце, бо крижуют ся з ньом дві воєвідскы дорогы: но 977 і 993. Жытелі, якы мают хыжы по другій страні рікы Ропа, можут ся достати до міста лем переізджаючы тоту крижівку, зато єст она барз міцно обтяжена. Часто доходит в тым місци до колізий. Інчым проблемом єст примірно брак тротуарів.

«Одтинок дорогы плянуваный до розбудовы то тіж комунікацийный пут для транспотру небезпечных ладунків, якы перевожены сут до підприємств о хімічным профіли, як тіж для ненормативных перевозів звязаных з продукцийом стальовых конструкций» – пояснят Івона Мікрут, специялистка дс. соспільной комунікациі в ҐДДДіА.

Коли зачнут ся роботы?

Плянувана розбудова державной дорогы в Ґорлицях має на ціли поправити технічный стан дорогы та єй параметры, жебы могли по ній іздити тяжшы авта, та збільшыти безпеку. Переходы для пішых мают быти заплянуваны наново, плянуваны сут тіж новы ходникы і роверовы пути. Окрем того розбудуют три скрижуваня: з ґмінном дорогом но К270279 (плянуют влучыти обводницю Ґорлиц до воєвідской дорогы но 977), з воєвідском дорогом но 977 (напрям на Конечну) та воєвідскыма дорогами но 977 і 933 (плянуют зробити двониткове турбінове рондо).

На тот момент ҐДДДіА оголосила конкурс на опрацуваня комплексовой проєктовой документациі влучні зо здобытьом адміністрацийных рішынь і триманьом надзору. Оферты мож складати до 9. червця/юнія тр. Час потрібный на зрыхтуваня документациі то 41 місяців од даты підписаня догваріня з выконавцьом. Коли реальні можут зреалізувати інвестицию?

«Найдолшый єст документацийный період і здобытя вшыткых дозволінь. Сама будова передвиджена є на рокы 2024-26. По конкурсі на выконавцю документациі оголосиме конкурс на будову» – інформує І. Мікрут.