В суботу, 18. марця 2017 р., в Ґорлицях одбыло ся загальне зобраня членів Стоваришыня Руска Бурса – то каждорічна стріча, выникаюча з записів статуту общества, котрой цілю являт ся підсумуваня діяльности орґанізациі за минулий рік. Зобраня зачал ведучий РБ, др інж. Павел Малецкій, котрий привитал прибывшых такой з цілой Польщы членів. Пак, попросил він о минуту тишы в інтенциі вмерлого влони бывшого члена Руской Бурсы, Михала Васильчака.
Загальне зобраня членів то предовшыткым орґанізацийно-справописова стріча, зато в мериторичній єй части ведучий П. Малецкій представил присутным справопис з діяльности Стоваришыня Руска Бурса за 2016 р. Окрем офіцияльно прочытаного собом документу, підсумуючого вшытко, што попри Рускій Бурсі ся діяло влони, попросил особы, котры реалізували поєдны проєкты, жебы оповіли і підсумували деякы обшыри діяльности орґанізациі, в котрых брали участ.
А было того вельо – стрічы і орґанізуваны подіі в будинку Руской Бурсы і другых місцях, ансамбль Терочка (пробы, выізды, концерты), выдавничо-трансляторска діяльніст (выданя клясикы лемківской літературы, науковых річників, байок для діти), медияльно-інформацийна обшыр і вшелеякы просторы діяльности Медияльной Ґрупы ЛЕМ.фм, на котру складают ся: наше інтернетове радийо ЛЕМ.фм (неодолга тіж в традицийным ефірі в околицях Ґорлиц і Польковиц), тыжденник ЛЕМ.фм+ і порталь lem.fm, котрий в тым моменті чытате.
Важным елементом діяльности Руской Бурсы єст і тото, же діє і єст отворена такой каждий ден, выполняючы функцию дому культуры, з Ізбом Івана Русенка, зо свойом фурт пошыряючом ся бібліотеком, де мож прити і не лем пожычыти книжкы, але тіж сісти, напити ся добру каву та на місци, в чытальни, почути бурсяну атмосферу. Руска Бурса то місце, до котрого приходят Русины і не-Русины, студенты, науковці, або просто люде заінтересуваны лемківском культуром, історийом і языком. Не на вшытко сут грошы і приданы ґранты, але тота штоденна (в великий мірі соспільна) робота на найвысшым професийональным рівни притігат новых і старых ентузиястів і спілпрацівників. Най лем малым приміром того (хоц обнимаючым великє чысло архівалий – абсолютных перлинок) буде переданя в рукы Руской Бурсы величезного архіву по Барбарі Тондос і Єжы Турі.
Дальше, на загальным зобраню членів Стоваришыня Руска Бурса выступил скарбник орґанізациі, Богдан Ґамбаль, котрий представил фінансовий справопис за 2016 рік, а Мирослав Пелехач, як ведучий Ревізийной Комісиі, одчытал контрольний справопис, по чым присутны члены більшістю голосів затвердили оба документы.
Разом з підсумуваньом минулого рока, бурсакы омовили пляны і проєкты на текучий рік, разом з отриманыма (або плянуваныма, же даколи вкінци придут) ґрантами і середками, котры споможут діяльніст общества в 2017 році. Остало лем подякувати уступуючому зарядови і вшыткым членам, заанґажуваным в ведіня Руской Бурсы в 2016 році.
Загальне зобраня членів Стоваришыня Руска Бурса на наступний рік зас дало довіря др інж. Павлови Малецкому проводити зарядови орґанізациі. Пониже, полнаий склад нововыбраного заряду:
- Павел Малецкій – ведучий заряду
- Даміан Трохановскій – заступник ведучого
- Наталия Малецка-Новак – секретар
- Богдан Ґамбаль – скарбник
- Андрий Трохановскій – член заряду
- Олена Дуць – член заряду
Члены Руской Бурсы выбрали тіж нову Ревізийну Комісию в складі:
- Мирослав Пелехач
- Варвара Дуць
- Моніка Тылявска
По выборах новых власти стоваришыня, присутны члены перешли до омовліня текучых проєктів і найблизшых плянів, з котрых домінуючом темом была смутня річниця 70. річниця Акциі Вісла, єдна з лемківскых ґеєнн ХХ столітя, яку будеме неодолга припоминати собі і світу. Як уж заявили сме на нашым портали – центральны лемківскы обходы зачнут ся в Рускій Бурсі 28. квітня/апріля 2017 р. проєкцийом документального фільму Мариі Сільвестрі і Джона Ріґетті Аж і слезы не старчыли / Even Tears Were Enough.
Желаме новому зарядови вшыткого доброго.
![](https://www.lem.fm/wp-content/uploads/2017/03/P.Maleckij_2_Zahalne_zobrania_2017-1024x919.jpg)
Медияльна ґрупа ЛЕМ.фм спостерегла, же тогорічне загальне зобраня членів Стоваришыня Руска Бурса прошло без штучного продолжаня і робліня проблемів, обышло ся без кликаня поліциі (як бывало по інчых роках, з причыны нарушаючых мир аґресорок, котры непрошены прібували бльокувати зобраня). Стріча членів одбыла ся понад поділами, не антаґонізуючо, лем з пошаном вшыткых поглядів, презентуваных вчас засіданя.