В ґміні Устя Рускє рыхтуют плян ґазифікациі

Як інформує війт ґміны Устя Рускє, Збіґнєв Людвін, зачал ся начальный етап рыхтуваня пляну ґазифікациі на обшыри декотрых місцевости. Концепцию опрацовує Польска Спілка Ґазовництва Одділ Гірничый Заклад в Кракові.

Проєктом, котрый буде зрыхтуваный по вступных анализах запотребуваня жытелів, мают быти обняты такы села як Ґладышів, Ждыня, Конечна, Смерековец, Реґєтів, Шквіртне, Квятон, Устя Рускє, Ганчова і Высова. Значыт тото, што концепция буде розплянувана тым разом на східню і середню част ґміны. Дальшы села, як Снітниця, Баниця ци Ізбы мают уж потягненый ґаз.

На ґмінным вебсайті находит ся анкєта, котру повинны выполнити заінтересуваны жытелі ґміны, а і вшыткы тоты особы, якы не жыют наштоден на обшыри ґміны Устя Рускє, але сут бодай властителями ділянок і хыж в тій части Лемковины. Анкєту мож так само одобрати од шолтысів поєдных сел і в уряді ґміны. Повинно ся іх выполнити і вернути до уряду до 30. листопада/новембра 2020 р.

В анкєті звідуют ся напримір о тото, ци даный маітель має замірене прилучыти ся до ґазовой сіти, а тіж чом, кєд бы деклярация была неґативна. Сут тіж звіданя о тото, якє є ваше актуальне джерело енерґіі, а тіж до якых ціли был бы хоснуваный ґаз.

Ґазифікация ґміны то єден з дальшых етапів єй розвитку. Прилучыня ся до ґазовой сіти вєдно з загальныма роботами на обшыри ґміны о єдным часі є о вельо туньше, як прилучыня ся до ґазу в пізнійшым часі.