В Ґладышові продолжают з будовом Дому Спокійной Старости

Фундация Іліос, яка діє предовшыткым на обшыри ґорлицкого повіту, продолжат з будовом Дому Спокійной Старости в Ґладышові. Етап єст уж дост міцно заавансуваный – будівля має стріху і заперты стіны з выглядами.

Дім Спокійной Старости в Ґладышові має быти доцільово місцьом для сеньорів, головно для осіб з інтелектуальныма і фізичныма дисфункциями.

В одповіди на запотрібуваня

Штораз більше осіб потрібує специялистичной помочы такых інституций, зато думка на будуву обєкту. Специфіком ґладышівского Дому Спокійной Старости буде тото, што перебывати в ним будут сеньоры, якы сут особами з дисфункциями.

Будівничым осередка єст Фундация Іліос – Сонце Щестя, яка на обшыри ґорлицкого повіту діє од більше як рока. Думкодавцьом єй покликаня єст о. Аркадий Баранчук, донедавна парох православной парохіі в Ґладышові і Реґєтові та скорше в Ждыни і Конечній.

Дім має быти направленый на особы, якы уж тепер берут участ в терапевтичных занятях реализуваных в рамках Закладу Професийоной Активности. В новобудуваным осередку особы тоты мают в будучности найти місце, де будут мочы дожыти старости і мати професийну терапевтичну і медичну опіку.

Як інформуют члены Фундациі, будучы жытелі Дому уж тепер анґажуют ся в його розвиток. Помагают м.ін. в простых будівляных роботах і порядках на будові. Сут то особы, якы наштоден занимают ся пасіками, опікуют ся звірятами, вырабляют свічкы ци сут робітниками кухні устяньской реставрациі Климківскы смакы.

Осередок має мати покоі з бальконами на поверсі, долов пару достосуваных покоів для осіб, якы будут м.ін. по ріжных выпадках, а якы ся не будут кваліфікувати до госпітализациі, але фурт будут си давати самы раду зо штоденністю. Початково Дім мал быти будуваный при Православным Осередку Милосердя Елеос.

Іліос – Сонце Щестя

Хоц Фундация Іліос – Сонце Щестя на обшыри ґорлицкого повіту діє однедавна, то уж має значучы успіхы. В повязаню з єй діяльністю покликаный был Заклад Професийной Активности.

Інституция была схвалена умовом помедже Маршалківскым Урядом та Фундацийом Іліос. Роботу в Закладі одраз нашли неполносправны особы з реґіону. Цілю ґладышівского Закладу – подібні як цілой фундациі – єст не лем дати людям роботу, пінязі, але што найважнійше – свідоміст, же сут, же можут быти незалежны і безпечны.

Ґладышівскій Заклад Професийной Активности є єденацетым такым закладом в Малопольщы.

В рамах фундациі діє уж і інчый осередок покликаный з думком на сеньорів. То Дім Сеньора Мария в Вапенным. Єст місцьом для сеньорів, де є нова нічлігова база для вандруючых по Низкым Бескіді туристів. Дім Сеньора може помістити аж 64 особы в невеликых комплексах. Част ізб має специяльны регабілітацийны постели. Сут тіж спільны місця, такы як тарасы ци ідальня.

В рамках Фундациі Іліос окрем выже описаных Домів, діют тіж спомнена реставрация в Устю Рускым і мінізоо в Ждыни.

Фундация звертат ся о фінансову поміч до вшыткых, якы хотіли бы спомочы будову ґладышівского осередка. Фонды мож посылати на банковый рахунок: 37 8795 0005 2001 0008 8532 0001 з дописом: Darowizna na budowę Domu Spokojnej Starości, ци тіж через сайт www.zrzutka.pl.