В Чорноріках новы спортово-рекреацийны інвестициі

Близко 3,4 млн зл выдаст ґміна Корчына на новы спортово-рекреацийны інвестициі в Чорноріках – місцевости, котру найдеме на обшыри называнiй Коросняньском Русю.

Трасу для лыж і товаришучый ій рекреацийно-спортовый будинок вознесут і для професийоналистів, і для аматорів ізды на лыжах.

«Як раз підписали сме догваріня на реализацию задачы Будова біговой трасы для лыж та рекреацийно-спортового будинку в місцевости Чорнорікы» – передал Ян Зых, війт ґміны Корчына.

Іщы того рока скейтеры і біговы лыжникы будут мочы схоснувати новы одтинкы трасы. Окружыня, котре має долгіст 400 м, по розбудуваню выдолжыт ся до 1250 м.

Чорнорікы. Інфраструктура для лыжників

При трасі вознесут двоповерховый будинок о просторі 190 кв м.

«Будут гын бюровы поміщыня, поміщыня до переобліканя. Будут лазничкы, так для спортовців, як і для туристів» – інформує війт.

Істнуюча дотепер лыжна траса притігала зимом вельох аматорів біганя на лыжах, головні в вікенды. Коли не было снігу, іздили по ній на рольках.

«З нашой ґміны є олимпійка біганя на лыжах, Ізабеля Марціш. Надієме ся, што на тых трасах будут тренувати тіж інчы професийоналисты. Може зроблят даколи гев дакы змаганя. При социяльным будинку буде мала трибуна, до хоснуваня вчас ріжных імпрез» – оповідат Ян Зых.

Війт заповіл, што буде ся старал о освітліня трасы, так жебы была доступна вельо годин.