В Чертіжнім припомянуть собі Добряньского

Округлый стіл Русинів Словеньска (ОСРС) выголосив рік 2017 за Рік Адолфа Добряньского. Тот юбілей быв выголошеный із нагоды 200-ой річніці од народжіня того вызначного русиньского будителя і політічного діятеля.

В рамках юбілейного року ОСРС апеловав на русиньскы орґанізації, котры діють на Словакії, жебы присвятили свої події як раз Добряньскогому і його округлій річніці. О приготовльованых подіях окремыма орґанізаціями говорило ся і на остатнім засіданю ОСРС, котре проходило в суботу 18-го фебруара 2017-го року в Пряшові.

Першу із подій, котры суть присвячены Року Адолфа Добряньского, приготовило Общество святого Йоана Крестителя. Адолф Добряньскый быв окрім іншого першым председом того общества, котре было засновано в 1862-ім році.

На суботу 4-го марца 2017-го року Общество святого Йоана Крестителя приготовлює подію під назвов Памятный день в честь Адолфа Добряньского. Подія одбуде ся в селі Чертіжне, окрес Меджілабірці, де є Адолф Добряньскый похороненый. Святкованя зачне о 10.00 год. в містній ґрекокатолицькій Церькви Вознесіня ся Господа, де ся буде одправляти Служба Божа. По службі буде подія продовжовати Панахідов на гробом будителя і по ній буде слідовати далшый културный проґрам.

Орґанізатор – Общество святого Йоана Крестителя, просить вшыткых, котры мають інтерес брати участь на події, жебы то оголосили до 1-го марца 2017-го року на імейлову адресу osjk.artos@zoznam.sk або на телефонічне чісло +421 57 73 98 147, жебы было забезпечено місце про каждого участника.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА