В Чабалівцях посвятили обновленый войновый цінтерь

Як інформовала словацька державна пресова аґентура TASR, в четверь 4-го октобра 2018-го року посвятили зреконштруованый войновый цінтерь із Першой світовой войны в Чабалівцях.

На пєтній події із нагоды сторічніці войны брали участь представителі Міністерства внутрішніх справ Словацькой републікы і Міністерства обороны, німецькый воєньскый аташе і представитель Амбасады Російской федерації на Словакії.

Унікатный проєкт трьох держав

Подля Михала Бодіна із Общества старостливости о німецькы войновы гробы на Словакії є на цінтері Першой світовой войны в Чабалівцях, окрес Меджілабірці, похороненых 2600 аж 3000 павшых вояків. Точна кількость не є знама, бо на цінтері суть і шахты, в котрых є похороненых дакілько вояків довєдна.

Цінтерь перешов у роках 2016 аж 2018 реконштрукційов, котру реалізовав німецькый Bundeswehr вєдно із Озброєныма силами Словацькой републікы. Оправу фінанчно підпорило і Міністерство внутрішніх справ Словацькой републікы. В далшій етапі до проєкту залучіла ся Російска федерація, котра дала грошы на оплочіня. Як раз то, же є то проєкт Словакії, Німецька і Російской федерації, є за словами Бодіна унікатом. Містне населіня так само дало свій вклад до проєкту, кедь за властны грошы збудовало каплічку.

Зновупосвячіня цінтеря, котре проходило у четверь, є єднов із централных подій ку сторічніці закінчіня Першой світовой войны. Подія проходила з участьов Воєньской музикы, членів Озброєных сил Словацькой републікы, церьковных представителів і шырокой публікы. В Чабалівцях зазвучала словацька, німецька і російска гімна. Мож было видіти флаґы вецеро наслідницькых держав бывшой Австро-Угорьской монархії і далшых держав, котры на події заступали їх діпломаты.

Цінтерь є в бывшых Стерківцях

Чабалівці находять ся сім кілометрів од міста Меджілабірці. Першый писемный документ о селі є із 1494-го року. В другій половині 19-го столітя до села адміністратівно приєднали довтогды окреме село Стерківці.

Войновый цінтерь в Чабалівцях находить як раз в містній части Стерківці. Належыть меджі найвекшы із Першой світовой войны на северовыході Словакії. Войновый цінтерь є на краї сільского цінтеря, в напрямі на Выраву. Од дргаы одділює го лем оплочіня сільского цінтеря і ярок. Вступ на войновый цінтерь веде через сільскый цінтер.

Жрідло фотоґрафії: Klub vojenskej histórie Beskydy.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА