В Будапешті одпремєрують новый філм о Теодорови Ромжови

Од 9-го до 11-го мая 2025-го року одбудуть ся в столиці Мадярьска X. Дні хрістіаньскых філмів і книжок. Тот фестівал реалізує ся з підпоров Уряду председы влады Мадярьска, Фундації Ґабора Бетлена і Народного уряду про медії і комунікацію.

Головныма покровителями той події суть Жолт Шемєн – підпредседа мадярьской влады, і єпіскоп Тібор Берта – мадярьскый воєньскый ордінарій.

В рамках фестівалу 10-го мая вечур одбуде ся і премєра нового біоґрафічного філму під назвов Теодор Ромжа. Біоґрафічну драму о русиньскім священомученикови – мукачовскім єпіскопови Теодорови Ромжови, яка має 76 минут, наточів режісер Аттіла Бокор. В головній ролі як Теодор Ромжа представить ся мадярьскый актор Жолт Дер.

Премєра, на котру є потрібна в припаді інтересу о участь реґістрація, одбуде ся в Державнім кіні Uránia в Будапешті, і на промітаню будуть участны і творцьове філму.

„По Другій світовій войні припала Підкарпатьска Русь Совітьскому союзу. Протицерьковны совітьскы власти намагали ся зрушыти підкарпатьску Ґрекокатолицьку церьков. Мукачовскый єпіскоп Теодор Ромжа одшмарив зречіня ся свойой ґрекокатолицькой віры і порушіня приобіцяня даного Папови. Зато го у 1947-ім році з позволіньом Сталіна брутално убили. Вмерти за Хріста значіть жыти навікы. У 2001-ім році го Папа Йоан Павел II. выголосив за блаженого. Філм основаный є на реалных діях,“ пише ся в анотації ку новій біоґрафічній драмі о блаженім священомученикови Теодорови.

Припоминаме, же лем тыждень перед премєров філму, 3-го мая 2025-го року, в селі Білкы на Підкарпатю одбуде ся беатіфікація далшого новомученика із русиньской Мукачовской єпархії – слугы Божого Петра Павла Ороса.