В Бенятині посвятили основный камінь монастыря

Із нагоды 1400-річніці од смерти св. Йоана Милосиового в православнім Катедралнім соборі Успенія Пресвятой Богородіці в Кошыцях, котрый є присвяченый і мену спомянутого святого, в неділю 10-го новембра 2019-го року проходила торжественна архієрейска літурґія.

Окрім домашнього михалівско-кошыцького архієпіскопа Высокопреосвященого Ґеорґія служыли єй і владыкове із заграніча. Інформовав о тім Офіціалный сайт Православной церькви на Словакії.

На торжестві брали участь Высокопреосвященый Амфілохіє, чорногірьско-приморскый метрополіта із Сербской православной церькви і Высокопреосвященый Антоній, метрополіта бориспольскый і броварьскый з Україньской православной церькви з благословліньом метрополіты Онуфрія.

В тот самый день вечур архієреї навщівили місце, на котрім має быти збудованый Монастырь св. Василія Острожского. Монастырь має стояти в селі Бенятина, в окресі Собранці. В Бенятині посвятили його основный.

Метрополіта Амфілохіє в приговорі участным повів, же тот монастырь буде представльовати карпатьскый Остроґ (Остроґ – знамый сербскый православный монастырь в Чорній Горі, позн. ред.) і єдночасно спомянув, же посвячіньом основного каміня Василій Острожскый якбы вертав ся до свойой отцюзнины, бо за словами метрополіты його предкове і предкове вшыткых Сербів походили якраз із Карпатьской области. Метрополіта Антоній приобіцяв молитвы за выбудованя нового монастыря і выразив надію, же монастырь чімскоріше буде выбудованый і він буде позваный на його посвячіня.

Село Бенятина має славного родака Андрія Бачіньского, котрый быв в роках 1773 аж 1809 мукачівскым ґрекокатолицькым єпіскопом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА