В Белеграді одпрезентовали русиньскы выданя

Од 19-го до 27-го октобра 2024-го року проходить 67-ый Меджінародный белеградьскый торг книжок, якый тот рік має мотто Слобода слова. Меджі выдавателями, котры одпрезентовали свою найновішу продукцію, были у четверь 24-го 2024-го року і русиньскы выдавателі із Сербії.

Як інформовала аґентура Рутенпрес, Русины вже традічно, презентовали свої найновішы книжковы выданя. Конкретно то были публікації, якы выдали Завод про културу войводиньскых Русинів,  Новинарьско-выдавательска інштітуція Руске слово і общество Руска матка.

Русиньскы выдавателі на белеградьскім святі книжок бісідовали о дакілько десятках выдань, котры были реалізованы меджі двома торгами, кедьже друкує ся велике чісло публікацій.

За общество Руска матка в Белеграді быв председа – Михайло Фейса, котрый бісідовав о веце книжках, якы выдала тота орґанізація, меджі іншым о недавно выданім зборнику поезії Ліляны Кидра з назвов Ядро ці о книзі гуморістічных приповідок Владиміра Дудаша Шмих нє грих. Книжку Путованє през шаховске кральовство представив в Белеграді сам автор – Владимір Лазор.

Фейса так само інформовав о публікаціях, котры бы мали выйти ку кінцю рока або в слідуючім році.

Книжкы, капіталного характеру, котры выдав Завод про културу войводиньскых Русинів і Руске слово пришли представити директоры тых інштітуцій – Саша Сабадош і Борис Варґа. Ішло о два документарістічны выданя, котры упрядковав іщі покійный професор Янко Рамач. О умелецькых – белетрістічных книгах, котры выдало Руске слово бісідовав Микола Шанта і Іріна Гарді Ковачевіч.

Окремо были презентованы книжкы про діти, причім новы дітячі публікації Олены Планчак-Сакч і Іріны Гарды Ковачевіч лем теперь вышли з друку.

Фото: Рутенпрес