В Белеграді бісідовали о веце членах меншын в шорах поліцайтів ці гасічів

30-го октобра 2024-го року зорґанізовала Орґанізація про безпечность і співпрацу в Европі в Белеграді стрічу представителів націоналных совітів із представителями сербского Міністерства внутрішніх справ, інформує аґентура Рутенпрес.

Темов даной стрічі была практіка і процедуры Міністерства внутрішніх справ при выбераню кандідатів із меншыновых комуніт про основну поліцайну освіту.

На стрічі были участны і представителі Націоналного совіту русиньской народностной меншыны – председа Йоаким Рац і Желько Ковач.

Ініціатором той робочой стрічі были Орґанізація про безпечность і співпрацу в Европі – місія в Сербії, і Рада Европы. Тоты дві меджінародны орґанізації звернули увагу Сербії на факт, же лем мале чісло поліцайтів і гасічів у Сербії походить спосеред членів народностных меншын.

О процедурі прийманя кандідатів на навчаня в рамках тых двох професій, якы суть під Міністерством внутрішніх справ, бісідовали компетентны особы – Неманя Радовіч із Центра про основну поліцайну освіту, і Сладяна Мілойковіч із Націоналного тренінґового центра про міморяны сітуації.

Як пише аґентура Рутенпрес, тоты інштітуції глядають підтримку з боку націоналных совітів – меншыновых самосправовань в Сербії, жебы пропаґовати тоты професійны службы у своїх народностных комунітах. На стрічі было обговорено і то, в якім віці мусять быти кандідаты на тоты дві професії, припадно якыма вшыткыма екзаменами мусять кандідаты перейти, жебы были прияты на школованя і пак до службы.