В Баници упамятніня 75. річниці зостріліня бомбардера Галіфакс

30. серпня/авґуста 2019 р. в Баници к. Кривой прошла подія упамятніня 75. річниці зостріліня польской команды з 1586. Ескадры Специяльного Перезначыня, бомбардера Галіфакс в серпни/авґусті 1944 рока, котрый летіл нести поміч воюючій Варшаві.

Літак зострілено 28. серпня/авґуста на граничній обшыри Баниці та Кривой. Згынуло товды семеро пільотів знаных з мена і назвиска. На упамятніня приіхали представникы Польского Войска, Поліциі, Державной Протиогньовой Стражы, скауты, лісникы, комбатанты, а тіж представникы публичных власти, жытелі близшой і дальшой околиці.

Подія зачала ся богослужыньом в інтенциі вмерлых aвіяторів служеным через семох священників, м.ін. римокатолицкого пароха Пьотра Романа з Ґладышова і грекокатолицкого пароха Петра Качмара з Лося. Присутных привитала Малґожата Малух, війт ґміны Санкова. Пак Александер Ґуцва одчытал лист од полковника Домініка Морґана – бритийского Аташе Обороны в Польщы.

Презес Стоваришыня Сеньорів Войсковой Авіяциі Польщы в Кракові полковник Станіслав Войдыла вручыл медалі вдячности, м.ін. Малґожаті Малух за плеканя памяти о польскых aвіяторах та Томашови Сікорскому за стараня довести до правильного зідентифікуваня екіпы бомбардера і місця катастрофы (скорше думано, што было то над Адриятиком). Статую НІКЕ признано Александрови Ґуцві, котрый єст думкодавцьом і творцьом памятника семох польскых членів екіпы Галіфакса.

Постерунок при памятнику выставили скауты з команды Джерело з Устя Руского та скауты з Ґорлиц, опікуном был заступця скаутского одділіня скаут Януш Баня. Выставленых было тіж шіст хоругви в асисті, м.ін. поліциі в Ґорлицях ци стоваришыня та клюбу aвіяторів з Кракова.

Знимка за sеkowa.info (автор: Александер Ґуцва). Більше найдете гев і гев.