Ужгород в Будапешті

«Вседержавноє Русинськоє Самосправованя» (ВРС) в Мадярьску на 22-го мая 2016-го року приготовлює «Русинськоє Націоналноє Сято», в рамках котрого є приготовленый културный проґрам. Свято Русинів у Мадярьску буде проходити в Народнім театрі в Будапешті.

На святочнім дні буде брати участь і высокопреосвященый владыка Філіп, метрополіта Ґрекокатолицькой гайдудорозьской метрополії, котрый одправить на зачатку цілой події Паракліс. Участны будуть і Віктор Крамаренко, председа ВРС, як і представителі державных орґанів.

В рамках події буде выступати і знамый фолклорно-етноґрафічный ансамбель Ужгород, котрый того року святкує тридцять років свого існованя. Колектів не выступать лем дома – на Україні, но і за граніцями. Своїма концертами успішно у своїй карьєрі Ужгород презентовав ся в Мадярьску, на Словакії, в Румунії, Польщі, Австрії, Німецьку, Італії, як і в далшых державах, быв участником і лавреатом многых міджінародных фолклорных фестівалів. За час свого існованя ансамбель выховав веце як сто танечників, музикантів, співаків, котры презентують фолклор Закарпатя у різных державах світа. Тот рік в марці з нагоды тридцятого юбілею ансамблю были в Ужгороді презентованы три публікації, котры суть присвячены історії колектіву.

Детайлный проґрам свята Русинів в Мадярьску найдете долов на плаґаті.

Жрідло фотоґрафії: zakarpattya.net.ua

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА