Уж є – нова „Бесіда” з календарьом на 2015 рік

Доступний є найновший номер часопису „Бесіда” (нр 6 (141), листопад-груден 2014), a в ним до прочытаня м.ін.:
– Б. Ґамбаль, Явожно – Лаґєр двох тоталітаризмів. Нова експозиция в Музею Міста Явожно;
– реляция з тогорічного Бієнале Лемківской/Русиньской культуры Бієнале в красі осени… А. Масляной;
– обшырний допис А. Рыджанич Лемко посвячений покійному Михалови Олеснєвичови, якій заінспірувал Роберта Урбаньского до написаня та выставліня на сцені спектаклю Лемко;
– рецензиі выдавництв: книжок Колядкы Русинів/Руснацох/Лемків, Кермеш (автор Роман Вархол), Łemkowie i Łemkowszczyzna (фотоґрафіі: Єжы Жак, текст: Марта Ґрабан-Бутрин) та платні Народил ся Христос (коляды заспіваны хором православной парафіі в Креници). Зрецензувал шефредактор ґазеты – Петро Трохановскій.

Двомісячник „Бесіда” то часопис Головного Заряду Стоваришыня Лемків, выходит од 1989 рока, посвячений є збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.

„Бесіду” мож почытати в бібліотеці Руской Бурсы в Ґорлицях.
Бібліотека отворена є в каждий понедільок в годинах 14.00-18.00 або по ідивідуальным догваріню в інчым терміні.