Вікенд лемківскых подій

В найблизшый вікенд, 12.-13. жолтня/октобра на Лемковині одбудут ся дві подіі, якы вписаны сут в шор традицийных акций проходячых од шумных років. То ХІІ Медженародне Бієнале Лемківской / Русиньской Культуры та ХХХІІ Лемківска Творча Осін.

Обі подіі того рока пройдут паралельно. Обі тіж зачнут ся в Креници, жебы конечно творці завершыли вікенд в просторах Руской Бурсы в Ґорлицях.

Уж пару років тому так было, што обі подіі зышли ся о єдным часі. Того рока буде подібні. Вікенд богатый в русиньску культуру зачне ся в Креници в найблизшу суботу од панахіды над гробом Епіфана Дровняка – Никыфора. Буде то початковый пункт Бієнале, котрого добром традицийом є припоминати памят выдатнопо артисты. Дальшым пунктом – знаным уж з попередніх едиций – буде зложыня квітня під Никыфоровым памятником при креницкым дептаку.

Артистична част пройде в Старым Здройовым Домі. В першым концерті выступит ЛАПіТ «Ластівочка», якій діє при Кружку Стоваришыня Лемків в Пшемкові (нижньошлезскє воєвідство) та другы ансамблі – запрошены гості, якы придут з сусідніх держав, де прожыват русиньска меншына.

В суботу о 20.00 год. в креницкым локалю «Зєльона Ґурка» зачне ся тогорічна едиция Лемківской Творчой Осени – стрічы русиньскых творчів з Лемковины і другых части Карпатской Руси.

Обі подіі пройдут на фоні тогорічных Талергофскых Упамятнінь, в звязку зо 110. річницьом поневоліня галицкых Русинів (в тым чыслі Русинів з Лемковины) в концентрацийным лаґрі в Талергофі на обшыри днешньой Австриі. Прото тіж в рамках культурных проґрамів не бракне навязаня до реченой темы, тым більше што істория Талергофу є міцно записана в лемківскым нацийональным контексті.

Другій ден, неділя, зачне ся зас в Креници од проходячой од рана в рамках Бієнале дискусиі на тему рівня актуальной лемківской / русиньской культуры. По обіді заплянуваный є недільный концерт приіздных русиньскых колективів.

На вечер, о 18.00 год. в ґорлицкій бурсі одбуде ся другій ден Лемківской Творчой Осени.