Успішні заколядували в Лісци

В понедільок 13. січня/януара в Лісци прошло лемківско-польскє колядуваня. В вертепі участ взяли діти з православной парохіі Успінія Пресвятой Богородиці в Зимній Воді. Саля была выполнена по берегы.

Для більшости молодых акторів і співаків выступ был сценічным дебютом, чого єднак не дали по собі познати. Тексты діти бесідували по лемківскы, а коляды співали і по лемківскы, і по польскы. «Сценариі вертепів сут барз ріжны, але вшыткы односят ся до народин Ісуса Христа» – повіл отец Славомир Кондратюк, настоятель православной парохіі в Зимній Воді, ґазда стрічы.

Серед запрошеных гости был тіж війт ґміны Любін Тадеуш Кєлян. «То неповторна подія і дякую, што міг єм взяти в ній участ. Бесідуваня о екуменізмі є важне, але іщы важнійше є його практикуваня. Жытелі Зимной Воды, Лісца ци Вєрцєня вказуют, што без огляду на тото, ци Різдво празднуєме згідні з григорияньскым ци юлияньскым календарьом, разом можеме святкувати тоту подію» – ствердил Тадеуш Кєлян.

Участникы вертепу выступували в розмаітых облечынях, декотры з реквізитами, в іх рыхтуваня заанґажуваны были родичы і дідове. Цілости пильнувала імост Мария Кондратюк. По успішным выступі, дітям розданы были подарункы. Святый Миколай доцінил тіж пару дорослых, м.ін. дириґента церковного хору Мирослава Дзямбу, якій разом з хористами прикрасили співом дітячый Вертеп.

Фот. Уряд Ґміны Любін