Урядова поміч для гірскых ґмін. В плянах м.ін. одбудова высівского басену

Уряд влады Польской Республикы плянує фінансово сперти гірскы ґміны, на обшыри котрых переважат туристична бранжа, яка з причыны локдавну єст міцно ослаблена. Урядовый проґрам помочы має рушыти в першій чветрці 2021 р. Таку інформацию подал перед парома днями віцепремєр Ярослав Ґовін.

Влада на поміч туристичным ґмінам зрыхтувала буджет в высокости 1 млд зл. Як туристичны ґміны зарахуваны до проґраму ратуваня туристикы были очывидно ґміны з обшыри Лемковины. Прикладом сут ґміны з обшыри ґорлицкого повіту, такы як Устя Рускє, Санкова, Ропа, Липинкы, Лужна та само місто і ґміна Ґорлиці.

Высокіст фінансовой помочы вынесе 40% вартости выдатків на інвестициі, якы дана ґміна понесла в роках 2016-2018. Грошы буде мож перезначыти на фінансуваня або дофінансуваня загальнодоступной туристичной інфраструктуры, а тіж комунальной інфраструктуры звязаной з туристичныма услугами.

По перерахуваню, примірово ґміна Санкова має шансу отримати близко 4 млн зл дофінансуваня. Пріоритетом буде побудувати сіт водопроводу в Мацині і каналізацию всядиль там, де єй іщы неє. Ґміна Устя Рускє за дофінансуваня буде хотіла выремонтувати невдану дотля інвестицию – басен в Высовій, якій перед деякым часом з причыны технічных порушынь завалил ся, та дорогу з Ґладышова до Кривой. Обі єдиниці можут старати ся іщы о грошы з проґраму підпертя для ґмін, в котрых фунґували зліквудуваны уж державны підприємства рільничой господаркы, тзв. ПҐР-ы.

Як деклярує уряд влады, фінансы будут переданы поєдным ґмінам протягом місяця од схваліня проґраму через Раду Міністрів.