Уповномоченый роздать селам і містам матеріалы о языковых правах

Уповномоченый влады Словацькой републікы про народностны меншыны Ласло Буковскый приготовив із своїм тімом інформачны матеріалы, котры познакомлюють о повинностях самосправ при публікованю інформацій в языку народностной меншыны.

На своїм офіціалнім фанпейджі на сіті Facebook Буковскый інформує, же матеріалы окрім словацькой верзії приготовили і в мадярьскім, русиньскім а україньскім языку.

„Вже рокы мам намагу поясньовати орґанам верейной справы, якы повинности і можливости їм давать меншыновый языковый закон. На стрічах ся все стрічам з реакційов, же як много можливостей маєме, а предці не хоснуєме,“ пояснює уповномоченый причіны актівности свого уряду.

Інформачны листы были приготовлены і на основі резултатів послідньой справы о хоснованю языків народностных меншын. Матеріалы хоче уряд дістрібуовати до сел і міст з тым, жебы їх публіковали на видительнім місці і пропаґовали меншыновы права.

Як припоминать аґентура TASR, в половині юла уряд уповномоченого выдав і методічный помічник про высшы теріторіалны цілкы (краї), котрый дотулять ся дотримованя і аплікації языковых прав меншын на уровни самосправных країв.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА