Умер Штефан Гудак

Як інформує аґентура Рутенпрес, вчера, 22-го фебруара 2015 р., по довгій і тяжкій хвороті умер в Петроварадині Штефан Гудак, вызначный учітель, писатель, новинарь, публіціста і робітник в културі і театрі.

Штефан Гудак, вызначна особность Русинів у Войводині, ся народив 6-го януара 1931 р. в Миклушевцях. По закінчіню основной школы продовжовав штудовати на ґімназії в Руськім Керестурі і потім на учітельскій академії в Осієку.

Такой по закінчіню учітельской академії зачав учітельовати в Босні і Герцеґовіні, пізніше ся став директором школы. Од 1953 р. до 1969 р. робив в Петровцях, так само як директор школы. В 1969 р. ся із родинов переселив до Нового Саду і робив як редактор културной рубрікы в русиньскій редакції Радіо Нового Саду, де быв аж до 1991 р., коли одышов на пензію.

Гудак быв членом Общества писателів Войводины, быв співпрацовником періодічных выдань „Шветлосц“, „Народни календар“, „Литературне слово“, „Нова думка“, „Думки з Дунаю“, в котрых ся му появило много приповідок, драм, оповідань, крітік і рецензій.

Як співавтор, вєдно з Михайлом Ковачом, выдав гуморістічный роман „Гриц Бандурик“, сам выдав збірку приповідок, роман „Шлїдом голуба по нєбе“, 8 драматічных творів, з котрых дакотры были і зроблены театрално, дві моноґрафії і до друку приготовив і позбераны творы Осифа Костелника, ці дакілько антолоґічных збірок. Сам мав творы в дакілько антолоґіях прозы, писав про дорослых і діти. Остатня книжка „Зайда за мирни сон“ му вышла перед двома роками у выданю „Руского слова“.

Жрідло і фото: Рутенпрес

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА