Умер Андрій Ґай – русиньскый малярь

В понедільок, 15-го фебруара 2016-го р. в Пряшові умер Андрій Ґай – русиньскый малярь, ілустратор, педаґоґ вытварного уменя. Умер у віку 84 років.

Народив ся Андрій Ґай у Сукові, в окресі Гуменне, 29-го януара 1932-го року. Закінчів русску ґімназію в Гуменнім і далше штудовав у рр. 1952-1958 на Высокій школі вытварных умень в Братіславі. По абсолвованю высокой школы зачав робити в Пряшові як вытварный редактор україньской ґазеты „Дружно вперед“. В рр. 1960 – 1973 робив на Педаґоґічнім інштітуті і Катедрі вытварной выховы Педаґоґічной факулты Універзіты Павла Йозефа Шафарика в Пряшові.

Од 1973-го року быв свободным умелцьом. Курто учів і на Людовій школі уменя і знова і на Катедрі вытварной выховы. Мальовав головно пейзажі, портреты, фіґуралны композіції, закутя. В періоді років 1960 – 1990 вытворив множество монументално-декоратівных творів у архітектурі, мальб на стіну, камянных і керамічных мозаік.

Андрій Ґай мав веце як 50 окремых і 150 колектівных выставок. У 1987 році здобыв медайлу За розвиток окресу Пряшів. В тім самім році му была передана в Кошыцях Премія крайского народного выбору за камянну мозаіку. Із нагоды його 80-той річніці од народжіня му у 2012-ім році была передана Ціна пріматора міста Пряшів за довгорічный і вынятковый вклад у области вытварного уменя і репрезентацію міста дома і за граніцями.

Наперед Андрій Ґай выставовав дома і за граніцями як словацькый або україньскый умелець, по 1989-ім році приєднався до ку далшым пряшівскым умелцям на выставках русиньского уменя.

Похороненый буде Андрій Ґай у пятніцю, 19-го фебруара 2016 р., о 13.00 год. на містьскім цінтері в Пряшові. Інформовало о тім пресове одділіня Містьского уряду в Пряшові.

Фотоґрафії: www.presov.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА