Уділили Премію імени Михаіла Града за 2024-ый рік

Як на своїм сайті інформовало Русиньске літературно-културне общество, в селі Буштино на Підкарпатю 16-го новембра 2024-го року одбыла ся святочна церемонія вручаня Премії імени Михаіла Града.

Общество премію, названу по вызначнім русиньскім писатлеьови – поетови, довгорічній голові – основательови Союзу русиньскых писателів Закарпатя, основало у 2023-ім році, коли были выголошены і першы лавреаты.

Премія має каждый рік вручати ся русиньскым умелцям Підкарпатя – літераторам, малярям, фотоґрафам, скулпторам і музикантам, за їх вклад до розвоя і пропаґації русиньской културы і літературы.

На події были участны окрім головы общества Івана Бинячовского, і председа Крайового общества підкарпатьскых Русинів Микола Бобинець, як і голова Тячовского районного общества підкарпатьскых Русинів Василь Микулин. Присутным быв і председа Областного общества Румунів Закарпатя „Дачія“ – Іон Ботош.

Премія імени Михаіла Града за 2024-ый рік має двох лавреатів. Першым є ведуча русиньского дітячого колектівы Кырниченька Едіта Канчій-Токар із Іршавы, котра была нагороджена за всокочіня, розвой і пропаґованя русиньской народной співанкы. Другым тогорічным лавреатом став Василь Кричфалушій – русиньскый поет з Буштина, якый дістав премію за пропаґованя русиньской літературы в рамках реліґійной тематікы.

Участны на кінцю події пішли ку памятнику чехословацького презідента Томаша Ґаріка Масарика, котрый быв одкрытый в Буштині у 2017-ім році.

Фотоґрафія: Микола Поцко.