Уці назад на лукы

«Бо выпасаня то од соток років інтеґральный елемент бескідскых лук. Хочу, жебы тото вернуло». «Старам ся о краєзнавчы приметы Низкого Бескіду». «То важна для краєвидів обшыр. А місцевы хотят гын лем новых доріг в середині парку і девізовых полювань». То лем част коментарів під петицийом до Дирекциі Маґурского Нацийонального Парку в справі приверніня культурового выпасу овец в долині Тихані.

106 осіб на днес підписало ся під петицийом о заступліня механічного способу кошыня лук на обшыри Тихані, Жыдівского і Незнайовой культуровым выпасом овец. Місце прожываня люди, котры підперают тоту ініциятиву, є розмаіте, од місцевых: з Крампной, Вышоваткы, Котани, Ожынной, Кривой, Ясла по великы міста як: Вроцлав, Варшава, Ґданьск, аж і заграничны Вотфорд ци Нюртінґен. Вшыткы они согласны сут з тым, што пастырство помагат в утриманю хороненых краєвидів і біоріжнорідности.

Головном цілю акциі є заховати характерны дла Маґурского Нацийонального Парку краєвиды і натуральный харатер лук в неістнуючых уж селах Незнайова, Жыдівскє, Тиханя та підтримати пастырску традицию як туристичну атракцию. Выпас овец мал бы заступити механічный спосіб кошыня лук на обшыри выміненых місцевости. Подібный як пропонуваный для долины Тихані спосіб культурового выпасу хоснуваный є м.ін. в Татряньскым Нацийональным Парку ци Пєніньскым Нацийональным Парку. Думкодавчыньом петициі є Малґожата Вітеска.

В поясніню петициі вычыслено, што пастырство може підтримати розвиток місцевого бізнесу через продукцию і продаж традицийных продуктів, нп. сырів, продаж волняных выробів та збільшыня культуровой, едукацийной туристикы і аґротуристикы. Як арґумент за культуровым выпасаньом овец подає ся, што уці ліпше, як механічне кошыня, хоронят перед закрячаньом і зарастаньом деревами лук, бо селективні і постепенно загрызают рослинніст, приспішают циркуляцию біоґенів та задоптуют дерню, што хоронит перед ерозийом ґрунту.

Петицию мож підписати за тым мотузком.