Ученикы можут голосити ся до конкурсу рецитациі лемківской поезиі

Єпархіяльный Осередок Православной Культуры Елпіс в Ґорлицях кличе до участи в ХIV Загальнопольскым Конкурсі Рецитациі Лемківской Поезиі, якій пройде 7. червця/юнія 2019 р. Голосити ся до конкурсу можут ученикы основных і ґімназияльных шкіл з цілой Польщы.

Подібні як в попередніх річниках, выділены сут окремы віковы катеґориі. Три з них направлены сут на учеників основных шкіл (клясы 0-ІІ, ІІІ-ІV, V-VI), а єдна на учеників VII-VIII клясы основной школы і ІІІ клясы гімназиі (остатнього річника ґімназиялистів). Каждый з участників конкурсу має зрыхтувати до вырецитуваня два вершы ріжных лемківскых поетів з буд-якого періоду лемківской літературы. Орґанізаторы дозваляют рецитувати єден верш в інчым языку як лемківскій. В конкурсі участ годны брати і тоты ученикы, якы не вчат ся лемківского языка в шкільным або позашкільным системі, а проявляют дяку деклямациі рідного слова.

Зголошыня до конкурсу приниманы сут до 31. мая 2019 р. Учытелі лемківского языка можут зголосити максимально двох участників, а за згодом орґанізатора тото чысло може быти збільшене. Зголошыня мож пересылати електронічном почтом на майльовый адрес Єпархіяльного Осередка Православной Культуры Елпіс в Ґорлицях (elpis@vp.pl). Конкурсовы переслуханя заплянуваны сут на 7. червця/юнія 2019 р. в Заґужанах (ул. Колейова 1).

Як інформує орґанізатор, головном цілю конкурсу єст підтримувати рідный язык, культуру і достоменніст Лемків. Конкурсове жырі покликане буде орґанізатором. В попередніх роках засідали в ним м.ін. учытелі лемківского языка. Жырі звертат увагу на лемківскій бесідуваный язык, деклямацию даного верша та дальшы формы выражаня поезиі. В попередніх едициях в конкурсі брали част ученикы лемківского языка зо шкіл з Лемковины, як тіж ґрупы з чужыны, што было добром нагодом до взаімного познаня і інтеґрациі учеників з ріжных пунктів вчыня.

фот. жырі ІХ Конкурсу