Участь меншын на публічнім жывоті є подля уповномоченого основов ефектівной меншыновой політікы

Забезпечіня участи народностных меншын на публічнім жывоті є основов того, жебы было мож бісідовати на Словакії о ефектівній меншыновій політіці. В розоговорі про словацьку пресаґентуру SITA то повів уповномоченый влады Словацькой републікы про народностных меншыны.

Одкликав ся притім на Лундьскы рекомендації, з котрых аплікаційов Словакія і дві декады по їх приятю заоставать.

Треба конкретны крокы

Покля Словакія думать політічны декларації о тім, же меншыны представлюють богатство країны досправды, пак є подля Буковского шанса, жебы ся зробили конкретны крокы.

„Тоты основны рамкы Высокого комісаря Орґанізації про безпечность і співпрацу в Европі про народностны меншыны в двох уровнях бісідують о участи меншын на публічнім жывоті: при вырішованях, наприклад на владній уровни, у выборах, на реґіоналній і містній уровни, в порадных конзултачных орґанах, як і в самосправных формах,“ повів про аґентуру уповномоченый.

За його думками треба найти правилный способ аплікації тых рекомендацій. „Тадь у общіх основах документ конштатує, же ефектівна участь меншын на сполоченьскім жывоті є єднов із основных частей мірной і демократічной сполочности, зато мусять влады прияти в одношіню ку народностным меншынам шпеціфічны крокы, жебы їм уможнити сохранити властну ідентічность,“ акцентовав Буковскый.

Конкретну форму тых кроків видить уповномоченый в прикладах доброй практікы в загранічу. Подля Буковского не треба нич нове выдумовати, Словакія може іншпіровати ся країнами околіці, лем треба волю.

Лундьскы рекомендації

Лундьскы рекомендації, котры дотуляють ся ефектівной участи народностных меншын на публічнім жывоті, были прияты у 1999-ім році. Мають помагати окремым державам прияти такы крокы, котры бы змірньовали існуючі напругы і помогли повнити задачу превенції конфліктів. Рекомендації належать меджі інштрументы такзваного мягкого bukправа в области охороны народностных меншын.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА