Убля буде мати турістічный центер

Гранічне село Убля, в окресі Снина, будує поліфункчный турістічный інформачный центер. Одкрытый бы мав быти вже в марці наступнього рока і мав бы словацькым і загранічным турістам давати комплексны інформації потрібны при подорожіню в сниньскій области, но і при подорожіню в Закарпатьскій области Україны. Денник Korzár о тім інформовала старостка села і ініціяторька цілого проєтку Надєжда Сіркова.

Як повіла про денник Сіркова, в селі мають рокы скушеностей з тым, же ся стрічали із турістами наприклад із Чехії, Німецька, Австрії, котры подорожыли на Україну і приходжали на сельскый уряд, жебы здобыти даякы інформації, што інтересне можуть видіти в Закарпатьскій области Україны, де можуть переночовати, де бы ся могли освіжыти і так подібно. Зато выникла думка зрядити в селі інформачный центер про турістів.

Про замір одкрытя турістічного центру село Убля одкупило од Міністерства внутрішніх справ Словацькой републікы будинок бывшой поліцайной станіці із фундушом. Село в тім видить окрім іншого выгоду так само із той причіны, же будова, о котру ся рокы нихто не старав, ся теперь зреконштруує. В центрі дасть село роботу єдному чоловіку, котрый буде навщівникам давати важны і інтересны онформації.

Проєкт, в рамках котрого выникне турістічный центер, має і своїх партнерів. Нима суть села Великый Березный, Стащін, Колониця, Збій і реґіоналны медії. Вшыткы села, котры суть в проєкті залучены, мають за думками Сірковой што понукнути турістам. Із той причіны была о споминаных селах публікована і книжка, в котрій суть здокументованы вшыткы містны памяткы і інтересности. Так само выникнув і новый інтернетовый сайт.

Навщівници села Убля дістануть в центрі інформації і о културных памятках, конкретно і деревяных церьквах, котры находять ся в сниньскій і собранецькій долинах. Обчаньске здружіня Карпатьскы деревяны церькви (Karpatské drevené cerkvi) в співпраці з партнерами в рамках проєкту Обновліня деревяных храмів, зъякостніня інфраштруктуры Біціґльовой стежкы ікон зреконштроувало пять будов і десять далшых артефактів, котры суть записаны до народных културных памяток, векшынов із 18-го столітя. Як повіла Сіркова, тоты два проєкты ся взаємно ідеално доповнюють.

Цільом проєкту є звышыти інформованость при розвитку турістікы і пропаґовати головно через реґіоналны медії тоту теріторію на обидвох боках граніці, на Словакії і на Україні. Проєкт є фінанцованый із норвеґійского фінанчного механізму і сполуфінанцованый з державного розрахунку Словацькой републікы. Цілковы кошты на выбудованя бы не мали быти веце як 143 тісяч евр.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА