У Войводині проблемы з одкрытьом русиньскых одділінь в школах

Як інформує аґентура Рутенпрес, у четверь 1-го юна 2023-го року одбыло ся перше засіданя Одбору про освіту нового скликаня Націоналного совіту Русинів. Засіданя одбыло ся в просторах Заводу про културу Войводиньскых Русинів в Новім Саді.

На проґрамі засіданя было десять пунктів. Найважнішов темов была інформація о записі школярів до русиньскых одділінь в школах. За актуалныма даныма в Коцурі суть записаны лем штирьми школярі до першой класы, в Дюрдьові пять, а в Руськім Керестурі 49 дітей.

О рік може быти векша проблема

В повязаню з тым, же в Коцурі записаны суть лем штири діти, буде треба найти іщі єдну дітину, жебы одкрыти русиньске одділіня. Другов можливостьов є написати жадость резортному секретаріяту і міністерству, жебы быв зробленый выняток, бо на одкрытя русиньского одділіня треба міннімално пять школярів.

В Дюрдьові теперь сповнюють лем мінімалне чісло дітей – пять. Рутенпрес звертать увагу, же о рік буде іщі векша проблема в Коцурі, бо не є дітей.

Школярів в русиньскім одділіню може мотівовати штіпендія. Родічі школяря, котрый учіть ся по русиньскы будуть діставати 5 000 дінарів на місяць, што є коло 42 евр. Но як видіти, ани штіпендія в нашых селах у Войводині не пересвідчіла родічів, жебы записали веце дітей до русиньского одділіня.

Проблемы і з выдаваньом учебників

На засіданю членове обговорили і проблемы з выдаваньом русиньскых учебників. Великым выдавництвам не оплатить ся друковати і выдавати малу тіраж, но в тім часі Русинам велику тіраж не є треба.

Так само выдаваня малой тіражі продовжує тремін друкованя. Натеперь суть готовы лем учебникы материньского языка про першу класу, про далшы класы учебників не є. Проблему голосять і з выданьом учебника музичной выховы.

„Хоць маєме мало школярів, на засіданю ся підкрелило, же на недавных змаганях в знаню материньского языка здобыли ся вынятковы резултаты. На меджіокружнім змаганю брало участь 51 школярів, на републіковім 22, з котрых перше місце заняло 15 школярів, друге місце 6, а третє єден школярь“, пише Рутенпрес.

Як інформує аґентура, і тот рік в місяці юл буде проходити літня школа про русиньскых школярів, котра традічно робить ся на Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА