У Виноградові розбили голову на памятнику Духновіча

Як інформує портал Голос Карпат днесь рано, 15-го марца 2017-го року, быв у центрі міста Виноградів пошкодженый памятник вызначного будителя карпатьскых Русинів Александра Духновіча.

Портал у статі далше інформує, же то не было зроблено умыселно. Виноватым за пошкоджіня памятника має быти конарь, котрый несподівано впав на памятник в часі, коли робітници містной комуналной службы зрізовали березы, котры мали конарі над памятником. По тім, што была буста Духновіча пошкоджена, закрыли єй. Редакція ословила і голову Областного културно-освітнього общества Александра Духовіча – Юрія Продана, но тот не хотів цілу подію коментовати.

Памятник Александра Духновіча в центрі Виноградова быв перед недавным часом зробленый Васильом Беленьом. Быв уміщеный лем дакілько десяток метрів од памятника Тараса Шевченка. О благоустроїня простору коло памятнька будителя Русинів на початку того рока постарав ся містный благодійный фонд Виноградів. Моментално не є ясно, ці ся подарить обновити і сам памятник, котрый быв рано пошкодженый.

Памятник Духновіча у Виноградові не є першым в історії міста. Іщі у 1925-ім році тутешня інтеліґенція одкрыла памятник будительови. Одкрытя было в тім часі великов културнов подійов цілого Підкарпатя. Участь на тій події брали многы втогдышні вызначны діятелі і хоры із Пряшова, Ужгорода і Мукачова. По анексії Підкарпатьской Руси Совітьскім союзом на місце памятника Александра Духновіча звудовали памятник Сталіна. По одсуджіню култу особности тото місце было порожнє.

Інтересным є, же пошкоджіня ся стало як раз в день, коли націоналістічны україньскы кругы в Закарпатьскій области Україны зачінають святковати 78-му річніцю выголошіня Карпатьской Україны, державы, котра екзістовала єден день, і котрой презідент Авґустін Волошин жадав о покровительство новиныкнутой державы проукраїньского напряму на теріторії історічной отцюзнины карпатьскых Русинів націстічне Німецько.

Жрідло фотоґрафій: goloskarpat.info

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА