У Свіднику хотять арендованы квартелі і новы домы

Будованя арендованых квартелів і приправа локаліты на выбудованя родинных домів суть меджі пріорітами міста Свідник у новім функчнім періоді.

Як про аґентуру TASR повіла пріматорка Свідника Марцела Іванчова, котра в октобровых комуналных выборах обгаїла свою функцію, зреалізовати хотять і проєкты, котры были уж підпорены.

Меджі послідніма підпореныма проєктами є і проєкт реґенерації а реконштрукції внутроблоку майже в центрі міста, котрый має змінити ся на оддыхову зону. До роботы ся хотять пустити на ярь слідуючого року.

У высокім штадію суть подля пріматоркы розроблены і далшы проєкты. „Наприклад заряджіня соціалных служеб. Приготовили сьме проєктову документацію, маєме платне ставебне позволіня, додавателя, котрый выграв конкурз, і моментално сьме подали жадость як єдна з першых самосправ в рамках плану обновы,“ приближыла Іванчова з тым, же далшым проєктом є выбудованя комунітного центра на Фестіваловій уліці, котра находить ся коло амфітеатру.

„Робиме і на проєкті арендованых квартелів, де выникне в будові бывшого інтернату 52 арендованых квартелів. Будеме жадати підпору із Штатного фонду розвоя бываня. Єдночасно зачінаме приготовльовати локаліту на будованя родинных домів. Подля перераховань бы мало іти о веце як 40 родинных домів,“ інформовала пріматорка.

За словами Іванчовой, в попереднім функчнім періоді місто зреконштруовало історічно найвеце пішників, драг, вытворило ся майже 80 місць на паркованя.

„То вшытко і вдяка тому, же сьме засновали Соціалный подник міста Свідник і у співпраці з Технічныма службами міста Свідник собі знаме много з такых діл зробити у властній режії, і за барз про місто прязну ціну.“

В рамках одпадового господарьства місту подля пріматоркы подарило ся зменшыти множество комуналного одпаду так, же просто шпорить і на тім, же не вывозить одпад на складку, але звекшує міру сепарованя. Іванчова вірить, же такый тренд подарить ся утримати і в слідуючім році.

Як повіла, розрахунок міста залежыть од того, як є місто успішне або неуспішне в проєктах. В минулім функчнім періоді мав Свідник за словами пріматоркы успішны проєкты за майже пять міліонів евр. В середнім чіслі розрахунок міста є коло 10 аж 11 міліонів на рік.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА