У словацькім парламенті є офіціално єден Русин

По марцовых парламентных выборах має Словакія нову владу і депутаты Народной рады Словацькой републікы вже засіли до своїх кресел і розділили ся до окремых парламентных выборів. Офіціално є на сайті словацького парламенту єден депутат, котрый собі записав русиньску народность. Є ним Миколай Крайковіч, котрый кандідовав за соціалнодемократічну партію SMER – SD премєра Роберта Фіца.

Крайковіч кандідовав із 63-го місця і до парламенту ся з того місця не дістав, кідьже його партія здобыла лем 49 кресел. По вытворіню коалічной влады многы зволены депутаты ішли до владных функцій, припадно до іншых функцій на міністерствах. Такым способом до парламенту одкрыла ся путь незволеным кандідатам. Так до парламенту дістав ся і Миколай Крайковіч, котрый як єдиный депутат в сучаснім словацькім парламенті пише собі русиньску народность.

Миколай Крайковіч народив ся 13-го апріля 1968-го року. Походить зо села Вапеник в окресі Свідник, в котрім быв єден час і старостом. Выштудовав Высоку школу міджінародного бізнісу в Пряшові. У парламнті сидів два цілы функчны періоды першой і другой влады Роберта Фіца (рр. 2006 – 2010 і 2012 – 2016) і єден скороченый функчный період за влады Іветы Радічовой (рр. 2010 – 2012), котрый скінчів передчасныма парламентныма выборами.

В минулім функчнім періоді мав Крайковіч найвеце служобных загранічных драх на Україну, де вецераз брав участь як позорователь на выборах. Словацькы медії го означіли за єдного із найменше актівных депутатів парламенту без єдиной леґіслатівной пропозіції ці позмінюючой або доповнюючой леґіслатівной пропозіції.

Крайковіч є у тім функчнім періоді членом Выбору Народной рады Словацькой републікы про земледілство і жывотне оточіня і  Окремого выбору Народной рады Словацькой републікы на контролю діялности Воєньской беспекы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА