У хыжці з Якубян одкрыли Ізбу Яна Олейника

В сканзені, котрый ся находить під замком в Старій Любовні, одкрыли в деревяній хыжці, котра походить із русиньского села Якубяны, окрес Стара Любовня, Ізбу Яна Олейника, вызначного словацького етноґрафа, котрый много свої досліджінь робив і в русиньскых селах того реґіону. Іформовала і том словацька пресова аґентура SITA.

Олейник даровав до Любовняньского музею, котрому належыть і спомянутый сканзен, россяглу бібліотеку і веце як 220 тісяч особных предметів. Бібліотека має 120 звязків літературы, котра є присвячена головно етнолоґії, етноґрафії і антрополоґії.

Святкованя в сканзені з одкрытьом ізбы

„Є про нас честьов, доктор Oлейник ня ословив уж перед роком і пів з пропозіціов, же бы хотів часть свого жывота передати до збірок нашого музея. Было то про нас миле несподіваня, же нам хоче даровати многы барз цінны історічны предметы,“ увів директор музея Далібор Мікулік.

Eтноґраф Олейник святковав 10-го мая свій жывотный юбілей – 95 років. Святкованя проходило як раз у сканзені під градом Любовня. „Приготовили сьме про нього веце дарунків. При тій нагоді сьме як раз у деревяній хыжці з Якубян, де він часто ходив робити досліджіня, одкрыли і працовню етноґрафа, то значіть Ізбу Яна Олейника. Хочеме, жебы навщівници виділи, же то, же ту стоїть сканзен і його експозіція, є і велика робота як раз фаховців з области етноґрафії,“ высвітлив директор музея і додав, же ся взаємно обдаровали, бо пан Oлейник у віці 95 років брав участь на цілім святкованю в сканзені.

Ян Олейник многы свої етноґрафічны роботы, головно з досліджованя русиньскых сел, публіковав в русиньскій періодічній пресі.

Наймолодшый сакнзен має і русиньску архітектуру

Сканзен під Любовняньскым замком належыть ку наймолодшым на Словакії і быв одкрытый у 1985-ім році. В сучасности го творить 25 обєктів. Домінантов є деравяна ґрекокатолицька Церьков св. архангела Михаіла із 1833-го року зо села Матисова, котра має бароково-класіцістічный іконостас. Церьков належыть до вызначных памяток деревяной церьковной архітектуры на выходній Словакії.

В сканзені мож найти і далшы архітекточны обєкты, котры походять головно із русиньскых сел окресу Стара Любовня. Домы збудованы на зачатку 20-го столітя походять із Великого Липника, Літмановой, Удола, Якубян, Кремной, Камюнкы, Орябины і словацького села Велика Лесна.

Частьов експозіції суть і технічны будовы, як ковальска кузня із другой половины 19-го столітя, млин, ці ділня столяря.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА