У Анагеймі рукоположыли нового єпіскопа Артура Бубневіча

По семох роках має Русиньска католицька єпархія Покровы Пресвятой Богородіці у Фініксі, Споєны штаты Америкы, нового єпархіалного єпіскопа. 28-го януара 2025-го року в Храмі Благовіщенія Пресвятій Богородіці в Анагеймі рукоположеный і інтронізованый владыка Артур Бубневіч, новый єпарха Фінiксу.

День перед єпіскопсков хіротонійов по вечурні склав новый єпарха єпіскопску присягу.

Головным служытельом літурґії, почас котрой быв рукоположеный владыка Артур, быв Высокопресвященый Вілъям Скурла, піттсбурзьскый архієпіскоп і митрополіта, котрый быв і головным святительом нового єпархы. Співсвятителями были владыка Курт Бурнетт – пасаіцькый єпарха, і владыка Роберт Піпта – пармскый єпарха.

На єпіскопскій хіротонії взяли участь далшы єпіскопи і духовенство. Участны были і єпіскопи мукачовской – русиньской традіції, котрой Піттсбурзьска митрополія є наслідником, і то мукачовскый єпарха Теодор Мацапула, і Высокопреосвященый Йона Максим – пряшівскый архієпіскоп і митрополіта.

Владыка Артур Бубневіч народив ся 22-го юна 1975-го року в Перечині, на Підкарпатю. Вступив до семінарії Мукачовской єпархії в Ужгороді, і в роках 1996 аж 2001 штудовав теолоґію, наперед в Ужгороді, пізніше на Меджінароднім теолоґічнім інштітуті про штудіум манжелства і родины в автрійскім Ґамінґу.

В роках 2006 аж 2013 быв секретарьом про проєкты в канцеларії Мукачовской єпархії, і єдночасно співпрацовав з владыком Міланом Шашіком при формованю молодежи і навчаню анґліцького языка.

В септембрі 2013-го року на запрошіня владыкы Джералда Діна, втогдышнього єпархы Фініксу, з благословліньом владыкы Мілана Шашіка, пішов служыти до Єпархії Фінікс. 9-го марца 2014-го року быв рукоположеный на діакона, і 14-го септембра того самого року быв рукоположеный на священика.

За пароха Парохії Матери Божой Безпрестанной Помочі в Албукерке, в Новім Мексіку, быв призначеный 1-го децембра 2014-го року. Быв членом Єпархіалной рады у справах покликань а Меджієпархіалной комісії у справах молодежи.

8-го новембра 2024-го року, на праздник Собора святого Архістратига Михаіла і остатніх безтілесных сил, Папа Римскый Франціск призначів отця Артура Бубневіча за нового правлячого єпіскопа Єпархії Фінікс.

Наперек тому, же в Піттбурзьскій митрополії є вже літурґічным языком анґліцькый язык, новый єпарха у Фінікці до свого єпіскопского ербу дав собі як мотто слова 17-го псалму по церьковнославяньскы.