TVP2 подорожує до Лемків – неділя, 11.30 год.

Заран, в неділю 4. вересня/септембра т.р., од 11.30 год. Канал 2 Польской Телевізиі выемітує проґрам, в котрым обзераючы будут мати нагоду одвидіти Лемків і Лемковину. Вересньовы/септембровы емісиі сут получены з новом осінньом рамівком, котра все приносит премєры або новы проґрамы. Так буде і тым разом – тым одтинком зачне ся третій сезон проґраму Подорожы з історийом. Перша част новой сериі то одтинок з наголовком В світі Лемків. 

Вказаны в ним будут кадры м.ін. з Квятони, Лоси, Чорного, Волівця, Бортного, Зындрановой та Новиці. Думаючы про вымінены села, не тяжко спостеречы, же част з них доднес асоциює ся з вельопоколіньовыма майстернями та ремеслом. За тым же фільмовці пішли м.ін. до Лоси, де одвиділи нашых мазярів, котры пояснят, чым є дегеть і в якій спосіб ся го вытварят. Квятон то очывидно єдна з найкрасшых лемківскых церкви, вписана на Листу Світовой Спадковины Юнеско. Обзераючы дознают ся дашто про значыня іконостасу в східнім обряді, як і про традицийний поділ на Лемковині серед мужчын і жен, котры в храмі ставали осібно, слідуючо по правій і лівій стороні. До Новиці фільмовці пішли за ремеслом вырабляня лжыц, а до Зындрановы – зазріти до традицийной лемківской хыжы, находячой ся в тамтышнім музею.

Коротку заявку про заранішній проґрам найдете гев. А што веце? – Дознаме ся заран.