Турістічный влак в Меджілабірцях буде в ретро штілі

Турістічный влак, котрый має ходити по дразі, а не по желізніці, має в Меджілабірцях розшырити діапазон турістічных актрактівностей і буде мати ретро подобу.

Локомотіва і два ваґоны з капацітов 40 людей будуть вызерати як стары локомотівы на пару. Як про аґентуру ТASR потвердив пріматор міста Владіслав Вышньовскый, влак про турістів бы по Меджілабірцях і околіці мав ходити од мая того року.

„Влак буде стояти коло Музею модерного уменя Енді Варгола і буде ходити по місті і близкій околіці, де ся находять памяткы різного характеру,“ інформовала меджілабірьска самосправа о проєкті фінанцованім в рамках проґраму Interreg V-A Польща – Словакія 2014 – 2020. Місцями, котры на влаку будуть годны турісты навщівити, мають быти наприклад історічный монастырь в Краснім Броді ці села Габура, де є і скулптура русиньского князяа Лабірця, або Калинів, перше ослободжене село на теріторії Чехословакії.

Окрім влаку, котрого ціна є понад 208 тісяч евр, місто купить і наіншталує і дві електронічны таблы з одходами влаків і автобусів на великій і малій желізнічній штації. Цілково є розрахунок проєкту в сумі понад 364 тісяч евр. Місто співфінанцує вытраты пятьома процентами.

Три автобусовы заставкы, котры суть частьов проєкту, уж місто осадило на кінцю 2020-го року. Суть коло Варголового музею, коло великой желізнічной, а так само коло малой желізнічной штації, котра ся моментално наново будує.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА