Туристичны перлины Підкарпатя. Серед номінуваных Музей Лемківской Культуры

До кінця квітня/апріля мож оддавати голосы в плебісциті Польского Радия Ряшів і Польского Товариства Туристично–Краєзнавчого під назвом Туристичны Перлины Підкарпатя. Серед номінуваных обєктів находит ся Музей Лемківской Культуры в Зындановій.

Голосы оддавати можеме тіж на інчы лемківскы памяткы архітектуры. Номінацию мают церков см. Михала в Туриньску з ХІХ ст., але так само місця, якы сут повязаны з нашом культуром той части Лемковины.

Реґіон богатый в атракцийны місця

«Підкарпатскє то чудова краіна, яка притігат і захоплює. Єст выняткого богата в рідку ґатункого природу та цікавы туристичны атракциі і нестрічаны памяткы архітектуры» – пише ся на початку опису плебісциту.

Фактично обшыр днешнього підкарпатского воєвідства покрыват ся в даякій мірі з етнічном обшырю части середньой і східньой Лемковины, де доднес находят ся памяткы архітектуры, цікавы місця повязаны з природом ци музеі і скансены.

Серед номінуваных нашло ся 50 ріжного рода обєктів. Голосувати мож за тым мотузком. Посылати відомости смс мож іщы до 30. квітня/апріля. Проголошыня результатів плебісциту має быти в ефірі Польского Радия Ряшів в періоді од 1. червця/юнія до кінця серпня/авґуста 2021 р.

Лемківскы памяткы

Серед номінуваных обєктів, якы односят ся до дідовизны Лемків, Русинів того реґіону єст предовшыткым Музей Лемківской Культуры в Зындрановій, найстаршый і найбільшый того рода музей в Польщы, якій презентує памяткы істориі, культуры, штоденного жытя, а і церковного обряду Лемків.

Номінацию має так само православна (скорше грекокатолицка) церков з Туриньска, презентуюча східній стиль лемківского сакрального будівництва, яка в 2013 р. была вписана на листу світовой спадковины UNESCO. Місцьом, котре тіж оддає по части духа давной Лемковины, єст номінуваный в плебісциті скансен – Музей Народного Будівництва в Саноку, в якым найти можеме перенесены з Лемковины памяткы архітектуры, в тым деревяну церков Рождества Пресвятой Богородиці з Ріпок.

Голосувати мож так само на цікавы природничы місця, што находят ся в реґіоні. То м.ін. видокова вежа на Церговій ци природничый резерват в Чорноріках, селі, якє лежыт на Коросняньскій Руси. Посередині медже Ґорлицями а Дукльом находит ся Фолюш – як раз номінацию має тота част, яка входит до Маґурского Нацийонального Парку.

В плебісциті стартуют так само село Команча – з місцьом інтернуваня польского примаса кард. Стефана Вышыньского, ци село Крамна з находячым ся гын воєнным цмонтерьом з часів І світовой войны.